फिफा विश्वकप २०२६ अन्तर्गत अन्तिम १६ को खेलमा क्यानडा र मोरक्कोबीचको पहिलो हाफ गोलरहित बराबरीमा सकिएको छ। 

ह्युस्टन स्टेडियममा जारी खेलको सुरुवाती समयदेखि नै क्यानडाले मैदानमा आफ्नो वर्चस्व कायम गरे पनि प्राप्त अवसरहरूलाई गोलमा परिणत गर्न सकेन । 

खेलको सुरुवाती चरणमा जेसी मार्सको प्रशिक्षणमा रहेको क्यानडाले निकै राम्रो प्रदर्शन गरेको थियो। टानी ओलुवासेयीले गोल गर्ने सुनौलो अवसर पाएका थिए भने स्टिफन युस्टाकियोको कप्तानी र पासहरूले मोरक्कोको रक्षापंक्तिलाई निकै व्यस्त राखेको थियो। 

मोरक्कोले खेलको पहिलो २५ मिनेटसम्म एउटा पनि प्रहार गर्न सकेन, जुन विश्वकपको इतिहासमा उनीहरूको लागि पहिलो पटक भएको खराब रेकर्ड हो।

मोरक्कोका लागि २३औं मिनेटमा ठूलो धक्का लाग्यो जब मिडफिल्डर इस्माइल सैबारी घाइते भएर मैदानबाट बाहिरिनु पर्यो। उनको स्थानमा सोफियाने राहिमी मैदान प्रवेश गरेका थिए। २४औं मिनेटमा दिइएको 'हाइड्रेसन ब्रेक' पछि मोरक्कोले खेलमा केही लय समात्ने प्रयास गरेको थियो। सोफियाने राहिमीले २५ मिनेटपछि मोरक्कोका तर्फबाट पहिलो प्रहार गरे पनि त्यसलाई क्यानडाका गोलकिपर म्याक्सिम क्रेपाउले सहजै बचाएका थिए।

पहिलो हाफमा खेलाडीहरू बीच तनाव पनि देखियो, जसका कारण रेफ्री माइकल ओलिभरले पाँचवटा पहेँलो कार्ड देखाउनु पर्यो। 

४१औं मिनेटमा अचरफ हाकिमीले क्यानडाका रिची लर्यालाई धकेलेपछि दुई टोलीका खेलाडीहरू बीच विवाद भएको थियो । जसको परिणाम स्वरूप दुवै खेलाडीले पहेँलो कार्ड पाएका हुन् । यसबाहेक क्यानडाका जोनाथन डेभिड र मोरक्कोका रेडुआन हलहाल तथा अजेदिन उनाहीले पनि फल गरेबापत पहेँलो कार्डको सामना गरे।
थप गरिएको ६ मिनेटको समयमा मोरक्कोले खेलमा पकड जमाउने कोसिस गरे पनि क्यानडाको रक्षापंक्ति चनाखो देखियो। यस खेलको विजेताले क्वार्टरफाइनलमा पाराग्वे वा फ्रान्सको सामना गर्नेछ।