भारत भ्रमणका रहेका राष्ट्रिय स्वतन्त्र पार्टी (रास्वपा)का सभापति रवि लामिछानेले भारतीय प्रधानमन्त्री नरेन्द्र मोदीसँग भेटवार्ता गरेका छन् । बुधबार लामिछानेले मोदीसँग भेटवार्ता गरेका हुन् ।

भारतीय जनता पार्टीको निमन्त्रणमा दिल्ली गएका लामिछानेले मंगलबार भाजपा अध्यक्ष नितिन नवीन, भारतीय विदेशमन्त्री डा. एस.जयशंकर र गृहमन्त्री अमित शाहलगायतसँग भेटवार्ता गरेका थिए ।

रविसँगको भेटवार्ताको तस्वीर सामाजिक सञ्जालमा राख्दै मोदीले भारतको ‘नेबरहुड फर्स्ट’ (छिमेकी पहिलो) नीतिअन्तर्गत नेपाल  प्राथमिक साझेदार मुलुक रहेको बताएका छन् । 

मोदीले रास्वपा सभापति लामिछानेसँग भेटघाट गर्न पाउँदा खुसी लागेको समेत उल्लेख गरेका छन् ।

उनले नेपाल र भारतबीच साझा समृद्धि र उज्ज्वल भविष्यका लागि नजिकबाट सहकार्य गर्ने लामिछानेको चाहनालाई आफूले स्वागत गर्ने र त्यसमा पूर्ण सहमति रहेको बताएका छन् ।

मोदीका अनुसार भेटवार्तामा नेपाल–भारत सम्बन्ध, विकास साझेदारी तथा दुई देशबीचको सहकार्यलाई थप सुदृढ बनाउने विषयमा छलफल भएको छ । 

‘नेपाल हाम्रो ‘नेबरहुड फर्स्ट’ नीतिअन्तर्गतको प्राथमिक साझेदार हो’, मोदीले भनेका छन्, ‘नयाँ सरकारसँग सहकार्य गर्दै दुई देशबीचको विशेष तथा बहुआयामिक सम्बन्धलाई अझ उचाइमा पुर्‍याउन हामी उत्सुक छौं ।’