२८ जेठ २०८३, बिहीबार
सशस्त्र प्रहरी बल, नेपालको प्रधान कार्यालयको एमटी शाखा (सवारी शाखा)मा बुधबार राति भएको आगलागी घटनाको छानबिन गर्न समिति गठन भएको छ ।
प्रधान कार्यालयले डीआईजी सन्दीप थापाको नेतृत्वमा छानबिन समिति गठन गरेको हो । सशस्त्र प्रहरी बलका प्रवक्ता एवं डीआईजी विष्णुप्रसाद भट्टका अनुसार समितिले काम शुरू गरिसकेको छ । समितिलाई छिटो छानबिन सकाएर प्रतिवेदन पेस गर्न भनिएको छ ।
बुधबार राति ८ बजेतिर सवारी शाखामा आगलागी भएको थियो । आगलागीबाट केही सवारीमा क्षति पुगेको बताइएको छ । बंगलामुखी गणबाट आएको टोलीले आगो नियन्त्रणमा लिएको थियो ।
सशस्त्रको प्रधान कार्यालयमा यसअघि पनि आगलागी भएको थियो । त्यस्तै, सतुंगलस्थित सशस्त्रको स्टोरमा पनि यसअघि आगलागी भएको थियो ।
