२८ जेठ २०८३, बिहीबार
अन्य विपक्षी दललाई रोष्ट्रम प्रयोग गर्न दिए पनि आफूहरूलाई समय नदिइएको भन्दै श्रम संस्कृति पार्टीले संसद्मा विरोध जनाएको छ ।
बुधबार बसेको प्रतिनिधिसभा बैठकमा सभामुख डोलप्रसाद (डीपी) अर्यालले नेपाली कांग्रेस, नेकपा एमाले, नेकपा र राप्रपालाई रोष्ट्रम प्रयोग गर्न समय दिएका थिए ।
तर, श्रम संस्कृति पार्टीका नेतालाई रोष्ट्रम प्रयोग गर्न दिएनन् । त्यसपछि श्रम संस्कृतिका सांसदले विभेद अन्त्य गर भन्दै नारा लगाउन वेलमा पुगे ।
श्रम संस्कृति पार्टीका सांसदले वेलमा नाराबाजी गरेपछि सभामुखले नियमावलीको दफा देखाउँदै कारबाही गर्ने चेतावनी दिए ।
त्यसपछि हर्कले ‘कारबाही गरेर देखा’ भन्दै नाराबाजी गरे । हर्कको भाषामा सभामुखले आपत्ति जनाए– ‘प्रयोग गरिरहेका शब्दावलीमा ध्यानाकर्षण भएको छ ।’
हर्कले फेरि भने–‘ फेरि कारबाही गरेर देखा ।’
सभामुखले दोहोर्याए– ‘श्रम संस्कृति पार्टीका सांसदका तर्फबाट निरन्तर अमर्यादित र सदनमा बोल्न नसुहाउने भएकोमा पटक-पटक ध्यानाकर्षण गराइरहेको छु ।’
श्रम संस्कृतिले नाराबाजी गरेपछि सभामुखले हर्कलाई बोल्न समय दिए । शुरूमा श्रम संस्कृति पार्टीलाई समय नदिने बताएका सभामुख अन्तिममा हर्कलाई समय दिए ।
