२९ जेठ २०८३, शुक्रबार
फिफा विश्वकप–२०२६ को समूह ‘बी’अन्तर्गतको खेलमा आयोजक राष्ट्र क्यानडाले शनिबार बोस्निया एन्ड हर्जगोभिनाको सामना गर्दैछ ।
क्यानडा र बोस्नियाबीचको खेल टोरन्टोस्थित बीएमओ फिल्डमा नेपाली समयअनुसार, मध्यराति १२:४५ बजे शुरू हुनेछ ।
पहिलोपटक घरेलु मैदानमा विश्वकप खेलिरहेको क्यानडाका लागि यो खेल निकै महत्त्वपूर्ण छ । नकआउट चरणमा प्रवेश गर्दै इतिहास रच्न यो खेलले महत्त्वपूर्ण भूमिका निर्वाह गर्न सक्छ ।
समूह ‘बी’मा क्यानडा र बोस्नियासँगै एसियाली च्याम्पियन कतार र स्विट्जरल्यान्ड पनि रहेका छन् । क्यानडाका लागि बाँकी दुई प्रतिद्वन्द्वी तुलनात्मक रूपमा बलिया हुन् ।
प्रशिक्षक जेसी मार्सको नेतृत्वमा रहेको क्यानडाली टोलीले पछिल्लो दुई वर्षदेखि यही प्रतियोगिताका लागि तयारी गरिरहेको छ । घरेलु मैदान र समर्थकको फाइदा उठाउँदै क्यानडा यो खेलबाट तीन अंक जोड्ने लक्ष्यमा छ ।
अर्कोतर्फ, १२ वर्षको लामो प्रतीक्षापछि विश्वकपमा फर्किएको बोस्निया एन्ड हर्जगोभिनाका लागि यो खेल निकै चुनौतीपूर्ण हुने पक्का छ ।
समूहमा स्विट्जरल्यान्ड र कतारजस्ता बलिया टोली रहेकाले बोस्नियालाई अघिल्लो चरणमा पुग्न यो खेलबाट कम्तीमा एक अंक जोड्नै पर्ने दबाब छ ।
क्यानडाका लागि सबैभन्दा ठूलो चिन्ता भनेको स्टार डिफेन्डर अल्फोन्सो डेभिसको अनुपस्थिति हो । ह्यामस्ट्रिङको समस्याका कारण डेभिस यो खेलमा सहभागी नहुने पक्का भएको छ ।
उनको अनुपस्थिति क्यानडाको आक्रमण र रक्षापङ्क्ति दुवैका लागि घाटा हो । यद्यपि, युभेन्टसका स्ट्राइकर जोनाथन डेभिड र ताजोन बुकाननको उपस्थिति टोलीका लागि सकारात्मक पक्ष हो । क्यानडाले आफ्नो अट्याकिङ लाइन–अपमा उनीहरूबाटै गोलको अपेक्षा गरेको छ ।
बोस्निया एन्ड हर्जगोभिनाको टोली ४० वर्षीय अनुभवी स्ट्राइकर एडिन जेकोको नेतृत्वमा मैदानमा ओर्लने छ ।
सेर्गेज बारबारेजको प्रशिक्षणमा रहेको बोस्निया रक्षात्मक रूपमा निकै बलियो मानिन्छ । सिड कोलासिनक र अमर डेडिकजस्ता खेलाडीको उपस्थितिले बोस्नियाको रक्षापङ्क्तिलाई थप मजबुत बनाएको छ ।
खेलको मुख्य केन्द्र क्यानडाको तीव्र आक्रमण र बोस्नियाको कसिलो रक्षापङ्क्ति बीचको प्रतिस्पर्धा हुनेछ । क्यानडाले आफ्नो ‘हाइ–प्रेसिङ’ खेलशैलीमार्फत बोस्नियाको डिफेन्स तोड्ने प्रयास गर्नेछ ।
अर्कोतिर, बोस्नियाले बलियो ‘मिड–ब्लक’ रणनीति अपनाउँदै क्यानडालाई गोलरहित बराबरीमा रोक्ने रणनीति अपनाउने सम्भावना छ ।
क्यानडा पछिल्ला अभ्यास खेलहरूमा गोल गर्न सँघर्ष गरिरहेको देखिन्छ, जसलाई तोड्न जोनाथन डेभिड र ताजोन बुकाननको तालमेल महत्त्वपूर्ण हुनेछ ।
क्यानडाले पछिल्ला पाँच खेलमा मिश्रित नतिजा निकालेको छ । केही खेलमा गोलरहित बराबरीमा रोकिए पनि भेनेजुएलालाई पराजित गर्दै टोलीले मनोबल बढाएको छ ।
यसैगरी, बोस्निया एन्ड हर्जगोभिनाले युरोपेली छनोट चरणमा इटाली र अस्ट्रियाजस्ता टोलीसँग बराबरी खेल्दै आफ्नो बलियो उपस्थिति देखाएको छ ।
फुटबल पण्डितहरूका अनुसार घरेलु मैदान र समर्थकको साथका कारण क्यानडा यो खेलमा थोरै बलियो देखिन्छ । तर, बोस्नियाको बलियो रक्षापङ्क्तिले क्यानडालाई कडा चुनौती दिने निश्चित छ ।
