नेपाल ब्याडमिन्टन संघले ब्याडमिन्टन वर्ल्ड फेडेरेसन (बीडब्लूएफ) तथा ब्याडमिन्टन एसियाको सहयोगमा दाङमा ‘शटल टाइम’ कार्यक्रम सम्पन्न गरेको छ।

विद्यालयस्तरमा ब्याडमिन्टन खेलको विकास र विस्तार गर्ने उद्देश्यले आयोजित उक्त कार्यक्रम ६ देखि १५ वर्ष उमेर समूहका बालबालिका लक्षित रहेको थियो ।

कार्यक्रमको मुख्य ध्येय बालबालिकाहरूलाई ब्याडमिन्टन खेलसँग जोड्दै स्वस्थ जीवनशैली, अनुशासन, आत्मविश्वास र नेतृत्व क्षमताको विकास गर्नु रहेको आयोजकले जनाएको छ ।

यसका साथै, तल्लो तहबाटै प्रतिभावान खेलाडीहरूको पहिचान गरी उनीहरूलाई राष्ट्रिय तथा अन्तर्राष्ट्रिय स्तरका खेलाडीका रूपमा तयार पार्ने संघको योजना रहेको छ।

सहभागिता र प्रशिक्षण

दाङका १८ विद्यालयका ४० जना शारीरिक शिक्षा शिक्षक र ३८ जना विद्यार्थीको सक्रिय सहभागिता रहेको कार्यक्रममा राष्ट्रिय संयोजक छविलाल शाहीले प्रशिक्षण सहजीकरण गरेका थिए ।

सहभागी शिक्षकहरूलाई बीडब्लूएफबाट प्रमाणित शैक्षिक सामग्री तथा आधुनिक प्रशिक्षण विधिहरूबारे प्रशिक्षित गरिएको छ । जसले आगामी दिनमा विद्यालयहरूमा ब्याडमिन्टन प्रशिक्षणलाई थप गुणस्तरीय बनाउने विश्वास लिइएको छ।

विश्वव्यापी मान्यता र भविष्यको लक्ष्य

'शटल टाइम' विश्वभर नै बीडब्लूएफद्वारा सञ्चालित एक सफल शैक्षिक परियोजना हो ।

यसले बालबालिकालाई ओलम्पिक खेल ब्याडमिन्टनको आधारभूत ज्ञान, करियरको सम्भावना र खेलकुदप्रतिको रुचि जगाउन महत्त्वपूर्ण भूमिका खेल्दै आएको छ।

नेपाल ब्याडमिन्टन संघले विद्यालयस्तरमा खेलकुद संस्कृतिको विकास गर्दै सक्रिय पुस्ता निर्माण गर्ने अभियानलाई तीव्रता दिएको छ ।

दाङबाट प्राप्त उत्साहजनक प्रतिक्रियापछि संघले आगामी दिनमा देशका अन्य जिल्लाहरूमा पनि यो अभियानलाई निरन्तरता दिने जनाएको छ।