०१ असार २०८३, सोमबार
ब्राजिलको रियो दि जेनेरियोमा आइतबार बिहान दुईवटा हेलिकप्टर एक-आपसमा ठोक्किँदा ६ जनाको मृत्यु भएको छ।
सहरको पश्चिमी क्षेत्रमा भएको सो दुर्घटनामा परी हेलिकप्टरमा सवार सबैको ज्यान गएको स्थानीय अधिकारीहरूले पुष्टि गरेका छन्।
अग्नि नियन्त्रकहरूका अनुसार एउटा हेलिकप्टर कार डिलरसिपको पार्किङ क्षेत्रमा खसेको थियो, जहाँ राखिएका विद्युतीय सवारी साधनहरूमा आगलागी भएको थियो। पछि आगोलाई नियन्त्रणमा लिइएको थियो।
प्रहरीका अनुसार उड्डयन अधिकारीहरूलाई बुझाइएको यात्रुको सूचीमा चर्चित अमेरिकी गायक तथा कमेडियन ओलिभर ट्रीको नाम समावेश छ। यद्यपि, दुर्घटनामा मृत्यु भएकाहरूको शवको आधिकारिक पहिचान हुन भने बाँकी छ। ओलिभरले शनिबार मात्रै ब्राजिलको एक छरछिमेकमा फुटबल खेलिरहेको भिडियो इन्स्टाग्राममा पोस्ट गरेका थिए।
यस्तै, सोही दुर्घटनामा अर्जेन्टिनाका प्रसिद्ध कन्टेन्ट क्रिएटर (युट्युबर) ग्यास्पर प्रिम डियाजको पनि मृत्यु भएको पुष्टि भएको छ। २३ वर्षीय ग्यास्पीका युट्युबमा २८ लाखभन्दा बढी फलोअर्स थिए। अर्जेन्टिनी स्ट्रीमिङ च्यानल 'ब्लेन्डर'ले सामाजिक सञ्जालमार्फत उनलाई श्रद्धाञ्जली अर्पण गरेको छ।
अधिकारीहरूले दुई हेलिकप्टर ठोक्किनुको कारणबारे अनुसन्धान सुरु गरेका छन्।
