०२ असार २०८३, मंगलबार
डेढ किलो कोकिनसहित तीन जना विदेशी नागरिकलाई प्रहरीले ठमेलबाट पक्राउ गरेको छ ।
लागूऔषध नियन्त्रण ब्यूरोले कोकिन लिएर आएका सेनेगलका नागरिक र सो कोकिन लिन भारतबाट आएका दुईजनालाई पक्राउ गरेको हो । पक्राउ पर्नेमा सेनेगलका ४३ वर्षीय अमादाउ सार, भारतकी २६ वर्षीया रुबी र ३१ वर्षीया सोनी छन् ।
सो कोकिन नाइजेरियाबाट इथियोपिया, कतार हुँदै काठमाडौं ल्याइएको ब्यूरोका प्रमुख एवं एसएसपी सुवासचन्द्र बोहराले बताए । एक साता लामो अप्रेसन चलाएर उनीहरूलाई पक्राउ गरिएको बोहराले जानकारी दिए ।
सेनेगलका नागरिक २६ जेठमा काठमाडौं आएका थिए । उनले कोकिन रहेको ७६ वटा क्याप्सुल खाएका थिए । प्रहरीले स्वास्थ्यकर्मीको सहयोगमा सो क्याप्सुल निकालेर कोकिन बरामद गरेको हो ।
सो कोकिन लिन आएका दुई भारतीय युवती पनि ठमेलको होटेलबाट पक्राउ परेका हुन् ।
