३१ असार २०८३, बुधबार
मियामीमा जारी फिफा विश्वकप २०२६ को 'अन्तिम ३२' को खेल अन्तर्गत अर्जेन्टिना र केप भर्डेबीचको खेलको पहिलो हाफ समाप्त भएको छ। खेलको पहिलो ४५ मिनेट सकिँदा कप्तान लियोनेल मेसीको गोलको मद्दतले अर्जेन्टिनाले केप भर्डेविरुद्ध १–० को अग्रता बनाउन सफल भएको छ।
अर्जेन्टिनाका लागि खेलको २९औं मिनेटमा लिसान्ड्रो मार्टिनेजको उत्कृष्ट पासलाई सदुपयोग गर्दै मेसीले सानदार गोल गरे। यो गोलसँगै मेसी जारी विश्वकपमा ७ गोल पुर्याउँदै 'गोल्डेन बुट'को दौडमा शीर्ष स्थानमा उक्लिएका छन्। यसै खेलमार्फत मेसीले विश्वकप इतिहासमा ३०औं खेल खेल्ने र २७औं खेलमा कप्तानी गर्ने नयाँ विश्व कीर्तिमान समेत कायम गरेका छन्।
पहिलो पटक विश्वकपको नकआउट चरण खेलिरहेको केप भर्डेले बलियो अर्जेन्टिनाविरुद्ध कडा चुनौती प्रस्तुत गरिरहेको छ। केप भर्डेका ४० वर्षीय गोलकिपर मोजिन्हाले मेसीको फ्री-किक र अर्जेन्टिनाका अन्य केही उत्कृष्ट प्रहारहरूलाई बचाउँदै टोलीलाई खेलमा टिकाइराखेका छन्।
मियामीको गर्मी र ओसिलो मौसमका बाबजुद रंगशालामा अर्जेन्टिनी समर्थकहरूको ठूलो उपस्थिति र उत्साहले मैदानको वातावरण निकै रोमाञ्चक देखिएको छ।
हालसम्मको खेलमा अर्जेन्टिनाले बलमाथि नियन्त्रण राखे पनि केप भर्डेले काउन्टर अट्याकमार्फत दबाब दिने प्रयास गरिरहेको छ। यस खेलको विजेताले अर्को चरणमा इजिप्टको सामना गर्नेछ।
