अमेरिका, क्यानाडा र मेक्सिकोमा जारी विश्वकपमा दक्षिण अफ्रिकाको प्रतिनिधित्व गरेका ‘मिडफिल्डर’ जेडेन एडम्सको शनिबार निधन भएको छ।

खेलकुद मन्त्री गेटन म्याकेन्जीले उनको निधनको पुष्टि गरेका छन् तर निधनको कारण भने बताएका छैनन्।

खेलकुद मन्त्री म्याकेन्जीले एक विज्ञप्ति जारी गर्दै भने, “जेडेन एडम्सको निधनको खबरले मलाई स्तब्ध बनाएको छ। दक्षिण अफ्रिकी फुटबलले आफ्नो सबैभन्दा उज्ज्वल युवा प्रतिभा गुमाएको छ।”

प्रहरीले शनिबार बिहान केप टाउनको केन्द्रीय उपनगर स्कोट्सचेकलुफस्थित एक घरमा २५ वर्षीय एडम्सको शव फेला परेपछि अनुसन्धान सुरु गरेको जनाएको छ।

“यो घटनाको बारेमा अनुसन्धान भइरहेको छ,” वेस्टर्न केप प्रहरी प्रवक्ता एफसी भ्यान विकले बताए।

एडम्सले प्रतियोगितामा दक्षिण अफ्रिकाको समूह चरणका सबै तीन खेल खेलेका थिए भने क्यानडाविरुद्धको नकआउट चरणको खेलमा उनी मैदानमा उत्रिएका थिएनन्। दक्षिण अफ्रिका नकआउट चरणबाटै यस वर्षको विश्वकपबाट बाहिरिएको थियो।

केप टाउनमा जन्मिएका उनले स्टेलनबोस एफसीबाट व्यावसायिक करिअर सुरु गरेका थिए र सन् २०२५ को जनवरीमा काफ च्याम्पियन्स लिग विजेता ‘मामेलोडी सन्डाउन्स क्लब’ मा आबद्ध भएका थिए।

उनको निधन दक्षिण अफ्रिकाको समूह ए अन्तर्गत चेकियाविरुद्धको खेलको पूर्वसन्ध्यामा उनकी हजुरआमाको निधन भएको एक महिना पनि नबित्दै भएको हो।

“जेडेनले चेकियाविरुद्धको खेलमा सुरुदेखि नै खेलेका थिए र हजुरआमाको निधनको पीडा बोकेर पनि आफ्नो सबै मेहनत दिएका थिए,” दक्षिण अफ्रिकी फुटबल सङ्घले खेलपछि उनको खेलप्रतिको इमान्दारिता र त्यागको प्रशंसा गर्दै जनाएको थियो।