नेपाली कांग्रेसले नेकपा एमालेले नेतृत्व गरेका प्रदेश सरकारबाट आफ्ना मन्त्रीहरू फिर्ता बोलाउने भएको छ । 

सुदूरपश्चिम प्रदेशमा नेकपा (एमाले)सँगको सहकार्यमा देखिएको असहजताका कारण कांग्रेसले एमालेसँगको गठबन्धनबारे पुनर्विचार गर्दै सरकारबाट बाहिरिने जनाएको छ ।

नेपाली कांग्रेसका महामन्त्री गुरुराज घिमिरेले सुदूरपश्चिममा एमालेले सृजना गरेको अप्ठ्यारो परिस्थितिका कारण एमालेसँगको सहकार्यलाई निरन्तरता दिन नसकिने अवस्था आएको बताए ।  

घिमिरेका अनुसार, कांग्रेसले अब एमालेसँगको गठबन्धनलाई पुनर्विचार गर्ने र एमाले नेतृत्वका सबै प्रदेश सरकारबाट आफ्ना मन्त्रीलाई फिर्ता बोलाउने भएको हो ।

‘सुदूरपश्चिममा एमालेले जुन अप्ठ्यारो पार्‍यो त्यसले अब हामीलाई एमालेसँगको गठबन्धन पुनर्विचार गर्नुपर्ने ठाउँमा पुर्‍याएको छ,’ घिमिरेले भने, ‘हामीले कर्णालीबाट फिर्ता हुने निर्णय गरिसकेका छौं र भोलिसम्ममा सबै प्रदेशका (एमाले नेतृत्वमा सरकार रहेको) मन्त्रीहरूलाई फिर्ता बोलाउने तयारी छ ।’

बुधबार नै कांग्रेस नेतृत्वको सुदूरपश्चिम प्रदेश सरकारबाट एमालेका मन्त्रीहरूलाई बर्खास्त गरिएको छ । 

एमालेसँगको दूरी बढेसँगै कांग्रेसले नेकपासँग नयाँ समीकरणका लागि छलफल शुरू गरेको छ । महामन्त्री घिमिरेले नेकपासँग पनि कुराकानी भइरहेको पुष्टि गर्दै यदि नेकपासँग ठोस सहमति हुन नसके कांग्रेस सातै प्रदेशमा प्रतिपक्षमा बस्ने स्पष्ट पारे ।

‘नेकपासँग पनि कुराकानी भइरहेको छ । यदि त्यो संवादले मूर्त रूप लिएन भने हामी सातै प्रदेशमा प्रतिपक्षमा बस्छौं’, उनले भने ।