काठमाडौं, १६ चैत-गत साउन ६ गते (शुक्रवार) अख्तियार दुरुपयोग अनुसन्धान आयोगको टोलीले मालपोत कार्यालय भक्तपुरका अधिकृत चक्रबहादुर श्रेष्ठलाई घुससहित पक्राउ गर्‍यो ।

चांगुनारायण नगरपालिका–७ बागेश्वरीको जग्गा कित्ताकाट गरी बाटो राखेर प्लट मिलान गर्ने कामका लागि ५० हजार रुपैयाँ घुस लिँदै गर्दा श्रेष्ठ अख्तियारको फन्दामा परे । भक्तपुरको कौशलटारस्थित वेभ सेकुवा कर्नरमा सेवाग्राहीबाट घुस लिँदै गर्दा अधिकृत श्रेष्ठसहित  नायव सुब्बा राजकुमार घिमिरे, नायव सुब्बा दिनेश रेग्मी र खरिदार दुर्गा पोखरेललाई पनि पक्राउ गर्‍यो ।

चालू आर्थिक वर्ष २०७४/७५ को शुरुवातमै अधिकृत तहका सरकारी अधिकृतलाई घुसहित रंगेहात पक्राउ गरेको अख्तियारले फागुन महिनासम्म ८८ जना कर्मचारीलाई पक्राउ गरेको जनाएको छ ।

अख्तियारको स्टिङ अपरेसनका क्रममा २ जना सह–सचिवसहित विभिन्न तहका ८८ जना ‘राष्ट्रसेवक’ कर्मचारी पक्राउ परेका छन् । पक्राउ पर्नेमा २ जनासहसचिव सहित ३ जना उपसचिव, ८ जना शाखा अधिकृत, ४ जना इञ्जिनियर, २७ जना नायव सुब्बा, १० जना प्राविधिक नायव सुब्बा, ५ जना खरिदार र २७ जना अन्य तहका कर्मचारी छन् । अख्तियारले १ जना प्रहरी नायव उपरीक्षक (डिएसपी) र १ जना प्रहरी निरीक्षक (इन्सपेक्टर)लाई पनि घुससहित रंगेहात पक्राउ गरेको जनाएको छ ।

कर्मचारीबाट ८ महिनामा ७५ लाखको घुसखोरी

अख्तियार दुरुपयोग अनुसन्धान आयोगले चालू आर्थिक वर्षका ८ महिनामा ८८ जना कर्मचारीलाई पक्राउ गरेको छ । ती कर्मचारीले ७५ लाख बराबरको घुसखोरी गरेको अख्तियारको ठहर छ ।

अख्तियारले ८८ जना कर्मचारीविरुद्ध ५६ वटा मुद्दा दर्ता गरी ७५ लाख रुपैयाँ बराबरको बिगो दाबी गरेको छ ।

४ कर्मचारीविरुद्ध अकूत सम्पत्तिको मुद्दा

अख्तियारले चालू आर्थिक वर्षमा ४ जना कर्मचारीविरुद्ध अकूत सम्पत्ति आर्जन गरेको अभियोगमा विशेष अदालतमा मुद्दा दायर गरको छ ।

अख्तियारले नेपाल विद्युत् प्राधिकरणका उप कार्यकारी निर्देशक महेन्द्रलाल श्रेष्ठ, उच्च माध्यमिक शिक्षा परिषदका सहसचिव देवीप्रसाद बाराकोटी, आन्तरिक राजश्व विभागका महानिर्देशक चूडामणि शर्मा र ठूला करदाता कार्यालयका प्रमुख कर अधिकृत टीकाराम भुसालविरुद्ध अकूत सम्पत्ति आर्जन गरेको अभियोगमा मुद्दा दायर गरेको हो ।

उनीहरूले सार्वजनिक पदमा बसेर ११ करोड ९८ लाख बराबरको स्रोत नभएको सम्पत्ति आर्जन गरेको अख्तियारका सहसचिव एवम् प्रवक्ता दीर्घराज मैनालीले बताए ।

८ महिनामा २४१ विरुद्ध मुद्दा, साढे १० अर्ब बिगो दाबी

अख्तियार दुरुपयोग अनुसन्धान आयोगले चालू आर्थिक वर्षका ८ महिनामा २ सय ४१ जनाविरुद्ध ९९ वटा भ्रष्टाचारका मुद्दा दर्ता गरेको छ । उनीहरूबाट १० अर्ब ४६ करोड बिगो दाबी गरिएको अख्तियारका प्रवक्ता मैनालीले बताए ।

विकास निर्माणका काममा विशेष निगरानी

अख्तियार दुरुपयोग अनुसन्धान आयोगले पूर्वाधार तथा विकास निर्माणका कार्यमा विशेष निगारानी शुरु गरेको जनाएको छ । अख्तियारका प्रवक्ता मैनालीले विकास निर्माणका कामको जाँच गर्न नयाँ प्रविधि र प्राविधिक जनशक्तिको व्यवस्थापन भइसकेको भन्दै अब भवन तथा सडक निर्माणमा हुने अनियमिततामा कमी आउने बताए । 

प्रवक्ता मैनालीका अनुसार अख्तियारले भवन निर्माणमा कमसल सामग्री प्रयोग भए नभएको जाँच गर्न एक्सरे मेसिन ल्याएको छ । ‘उक्त मेसिनले कुन भवनको कुन भागमा कस्तो खालको निर्माण सामग्री भएको छ भन्नेबारे सबै जानकारी सजिलै हासिल गर्न सकिन्छ,’ प्रवक्ता मैनालीले भने, ‘यस्तै सडकको गुणस्तर मापन गर्न इन्जिनियरसहितका प्राविधिक जनशक्तिको पनि व्यवस्थापन गरिएको छ ।’

प्रवक्ता मैनालीले अहिले मध्यपहाडी लोकमार्गअन्तर्गत खोटाङको हलेसी सडखखण्डमा कमसल सामग्री प्रयोग भएको उजुरीमाथि उनुसन्धान भइरहेको बताए । ‘मध्यपहाडी लोकमार्गको हलेसी सखडकखण्डमा कमसल सामग्री प्रयोग गरिएको । बाटो बनाएको महिनादिन नपुग्दै भत्किन थालेको भनेर उजुरी परेको थियो,’ प्रवक्ता मैनालीले भने, ‘अहिले अख्तियारको प्राविधिक टोलीले उक्त सडकखण्डमा प्रयोग भएका सामग्रीमाथि अनुसन्धान गरिरहेको छ ।’ 

कमसल सामग्री प्रयोग भएको पाइएमा सडक निर्माणको जिम्मा पाएको ठेकेदार कम्पनी र सडक निर्माणको जिम्मा लिएको मध्यपहाडी लोकमार्ग परियोजनाका अधिकारीविरुद्ध भ्रष्टाचारको मुद्दा दर्ता गरिने मैनालीको भनाइ छ ।