२९ जेठ २०८३, शुक्रबार
काठमाडौं, १९ वैशाख-सञ्चार तथा सूचना प्रविधि मन्त्रालयले ‘राष्ट्रिय सूचना तथा सञ्चार प्रविधि दिवस’ मनाएको छ ।
भृकुटीमण्डपस्थित नेपाल पर्यटन बोर्डको हलमा बुधबार विशेक कार्यक्रम गरी दिवस मनाइएको हो । सूचना तथा सञ्चार प्रविधिलाई जनातामैत्री बनाउने उद्देश्यले राष्ट्रियस्तरमै कार्यक्रम गरेर सूचना तथा सञ्चार प्रविधि दिवास मनाइएको यो पहिलो पटक हो ।
कार्यक्रममा बोल्दै मूल समारोह समितिका अध्यक्षसमेत रहेका सञ्चार सचिव महेन्द्रमान गुरुङले अहिलेसम्म सरकारले सूचना तथा सञ्चार नीति बनाएर काम गर्दै आइरहेको र अब त्यसलाई ऐनकोरूपमा विकसित गर्नुपर्ने आवश्यकता देखिएको बताए ।
‘सूचना तथा सञ्चार ऐनको मस्यौदा अन्तिम चरणमा छ, यसलाई पारित गरेर कार्यान्वयन गरिनेछ,’ उनले भने ।
कार्यक्रममा बोल्दै सूचनाविद् डाक्टर रुद्र पाण्डेले सरकारको कर प्रणालीको आलोचना गरेका थिए ।
सूचना तथा सञ्चार प्रविधिसम्बन्धी व्यवसाय गर्नेहरूलाई झन्झटिलो कर प्रणाली लगाएर सरकार यसको विकासमा बाधक बनेको उनको भनाइ थियो ।
त्यस्तै वक्ता ज्योति तण्डुकारले नेपालको सूचना प्रविधिले भविष्यको मागलाई सम्बोधन गर्नुपर्ने बताए ।
प्रधानमन्त्री केपी शर्मा ओलीको सचिवालयका सूचना प्रविधि विज्ञ असगर अलीले सरकारले एक वर्षभित्रमा जनताका सबै तथ्याङ्कहरूलाई डिजिटलाइज्ड गर्ने बताए ।
ढिला गरी शुरु भएको कार्यक्रममा प्रमुख अतिथि सञ्चार तथा सूचना राज्यमन्त्री गोकुल बाँस्कोटा आउन ढिलाइ भएपछि सहभागीहरू लाखापाखा लागेका थिए ।
