काठमाडौं– आइतबार साँझ काठमाडौंको काडाघारीबाट अपहरणमा परेका बालक निशान खड्का मृत फेला परेका छन् । 

अपराध महाशाखाको टोलीले खोजतलास गर्ने क्रममा अपहरणकरीसँग दोहोरो मुठभेड भएको थियो । प्रहरी इन्काउन्टरमा दुई अपहरणकारीको मृत्यु भएको छ ।

प्रहरी र अपहरणकारीबीच दिउँसो १ः२१ बजे भएको मुठभेडमा नुवाकोटका गोपाल तामाङ  र सिन्धुपाल्चोकका अजय तामाङको मृत्यु भएको छ । अपराध महाशाखाको टोलीले बालकको शव भेटिएको भक्तपुर नगरपालिका–७ स्थित श्याम लवटको निर्माणाधीन घरबाट पछ्याउँदा अपहरणकारीसँग सुर्यविनायक नगरपालिका–८ स्थित पाइलट बाबाको आश्रम जाने बाटोमा मुठभेड भएको हो । मुठभेडमा दुवै अभियुक्तको मृत्यु भएको प्रहरीले जनाएको छ ।

घटनास्थलबाट प्रहरीले पेस्तोल, २ राउण्ड गोली बरामद गरेको छ । अपहरणकारीले फिरौती माग्न प्रयोग गरेको मोवाइल र सीम समेत बरामद गरिएको प्रहरीले जनाएको छ । अपहरणकारीले ४० लाख फिरौती मागेका थिए ।

आईतबार साँझ स्कूलबाट फर्कपछि बालकको अपहरण भएको थियो । भक्तपुर नगरपालिका–७ स्थित श्याम लवटको निर्माणाधीन घरमा बालकको शव हत्या गरिएको अवस्थामा दिउँसो १२ः३० बजे प्रहरीले फेला पारेको थियो ।

यसअघि, प्रहरीको अपराध महाशाखाको टोलीले सोमबार दिउँसो अपहरणको आशंकामा १ जना महिलालाई पक्राउ गरेको थियो । अहिले उनीसँग प्रहरीले सोधपुछ गरिरहेको छ । फिरौतीकै लागि बालकको अपहरण भएको प्रहरीको प्रारम्भिक छानविनले देखाएको छ ।

यस्तो थियो घटना 

आइतवार साँझ करीब ६ बजे काँडाघारीबाट बालक अपहरण परेको प्रहरीलाई सूचना प्राप्त भएको थियो । 

सिन्धुपाल्चोक घर भई काँडाघारीमा चिया पसल चलाउने भमेली खड्काका ११ वर्षीय छोरा निशान खड्का अपहरणमा परेका थिए । अपहरणकारीले बालककी आमासँग ४० लाख फिरौती रकम माग गरेका थिए । 

अपहरणको सूचना पाएपछि आइतवार राति ८ बजेदेखि प्रहरी परिचालन भएको थियो । बालकका बुवा गणेश खड्का रोजगारीका लागि मलेसियामा रहेका छन् ।