काठमाडौं– आइतबार साँझ काठमाडौंको काँडाघारीबाट अपहरणमा परेका बालक निशान खड्का मृत फेला परेका छन् । 

अपराध महाशाखाको टोलीले खोजतलास गर्ने क्रममा अपहरणकरीसँग दोहोरो मुठभेड भएको थियो । त्यस क्रममा दुई अपहरणकारीको मृत्यु भएको छ । 

भक्तपुर नगरपालिका–७ स्थित श्याम लवतको निर्माणधीन घरमा बालकको हत्या गरिएको अवस्थामा शव फेला परेको प्रहरीले जनाएको छ । 

शव भेटिएपछि अपहरणकारीको पिछा गर्ने क्रममा सूर्यविनायक नगरपालिका ८ पाइलटबाबाको आश्रम जाने बाटोको जंगलमा अपहरणकारीसँग मुठभेड भएको थियो ।  मुठभेड हुँदा प्रहरीको जवाफी कारवाहीमा दुई जना अपहरणकारीको मृत्यु भएको हो । 

मृतक अपहरणकारीहरुको नाम खुल्न सकेको छैन । अपराध महाशाखको टोलीले घटनास्थलबाट एउटा पेस्तोल, दुई राउण्ड गोली, केही मोबाइल फेला पारेको छ । 

यसअघि अपराध महाशाखाको टोलीले सोमबार मध्याह्न अपहरणको आशंकामा एक जना महिलालाई पक्राउ गरेको थियो । अहिले उनीसँग सोधपुछ र छानविन भइरहेको प्रहरीले जनाएको छ । 

यस्तो थियो घटना 

आइतवार साँझ करिब ६ बजे काँडाघारीबाट बालक अपहरण परेको प्रहरीलाई सूचना प्राप्त भएको थियो । 

सिन्धुपाल्चोक घर भई काँडाघारीमा चिया पसल चलाउने महिलाका ११ वर्षीय छोरा निशान खड्का अपहरणमा परेका थिए । 

अपहरणकारीले बालककी आमासँग ४० लाख फिरौती रकम माग गरेका थिए । 

अपहरणको सूचना पाएपछि आइतवार राति ८ बजेदेखि प्रहरी परिचालन भएको थियो । 

बालकको बुवा कामका लागि मलेसियामा रहेका छन् ।