काठमाडौं– महाराजगन्जस्थित मनमोहन कार्डियोथोरासिक तथा ट्रान्सप्लान्ट सेन्टरमा उपचाररत प्रधानमन्त्री केपी शर्मा ओलीलाई भेट्न डाक्टर गोविन्द केसी पुगेका छन् । केसी बुधबार राती ९ बजे ओलीलाई भेट्न अस्पताल पुगेका हुन् । 

सो क्रममा केसी र ओलीबीच करीब १० मिनेट कुराकानी भएको बताइएको छ । डा केसी पक्षीय डाक्टर अभिषेकराज सिंहले ओली र केसीबीच करीब १० मिनेट कुराकानी भएको बताउँदै सो क्रममा प्रधानमन्त्रीले आफ्नो स्वास्थ ठीक भएसँगै चिकित्सा अिशक्षा विधेयक अघि बढाउने प्रतिबद्धता जनाएको बताए । 

‘म अस्पतालबाट डिस्चार्ज हुनेबित्तिकै चिकित्सा शिक्षा विधेयक अगाडि बढ्छ’ ओलीको भनाई उदृत गर्दै सिंहले भने । 

केसीले चिकित्सा शिक्षा विधेयक ल्याउनेसम्बन्धी आफ्नो माग पूरा नभए फेरि अनसन बस्ने बताउँदै आएको अवस्थामा ओलीले यस्तो प्रतिबद्धता जनाएका हुन् । 

सो क्रममा डा केसीले ओलीको स्वास्थ्य लाभको कामना समेत गरेका थिए । 

स्वास्थ्यमा समस्या आएसँगै ओली दुई दिनयता महाराजगन्जस्थित मनमोहन कार्डियोथोरासिक तथा ट्रान्सप्लान्ट सेन्टरमा उपचाररत छन् । 

चिकित्सकहरुले ओली कम्तीमा पनि शनिबारसम्म अस्पतालमै रहनु पर्ने बताएका छन् । यद्यपी उनको स्वास्थ्य अवस्था सुधारोन्मोख छ ।