१९ असार २०८३, शुक्रबार
गुल्मीमा होम क्वारेन्टीनमा बसेका एक जनाको मृत्यु भएको छ ।
जिल्लाको छत्रकोट गाउँपालिका वडा नम्बर– ५ मैनडाँडा निवासी ६९ वर्षिय पुरुषको मृत्यु भएको जिल्ला प्रहरी कार्यालय गुल्मीका प्रहरी उपरीक्षक राजेन्द्रसिंह खड्काले बताए ।
गत जेठ २५ गते भारतबाट आएर होम क्वारेन्टीनमा रहेका व्यक्तिको मृत्यु भएको हो ।
मृतक पुरुष प्यारालाइसिसको बिरामी रहेको गाउँपालिकाका स्वास्थ्य संयोजक पुण्य पौडेलले बताए ।
भारतमा उपचार गरेर घरमा ल्याइएका पुरुषको बिहीवार कोरोना परीक्षणका लागि आरडीटी पोजेटिभ आएको जिल्ला स्वास्थ्य कार्यालय गुल्मीका सूचना अधिकारी पशुपति आचार्यले बताए ।
उनको गएराति मृत्यु भएको हो । मृतक पुरुषको स्वाब संकलन गरेर प्रादेशिक प्रयोगशाला रूपन्देहीमा पठाइएको आचार्यले बताए ।
मृतक पुरुषलाई भारतबाट हेरचाह गर्दै नेपाल ल्याएका अर्का एक जनाको आरडीटी परीक्षण नेगेटिभ आएको जिल्ला स्वास्थ्य कार्यालय गुल्मीले जनाएको छ ।
भारतबाट आएर क्वारेन्टीनमा बस्न नसक्ने भएपछि मृतकका छोरीज्वाइँले हेरचाह गर्ने गरी होम क्वारेन्टीनमा राखिएको गाउँपालिकाका स्वास्थ्य संयोजक पौडेलले बताए ।
मृतक पुरुषको शवलाई व्यवस्थापन गर्न नेपाली सेना घटनास्थल पुगेको छ ।
गुल्मीमा हालसम्म कोरोना संक्रमितको संख्या १०५ जना पुगेको छ । संक्रमितमध्ये ३ जना उपचारपछि घर फर्किएका छन् ।
जिल्लामा कोरोना संक्रमणबाट २ जनाको मृत्यु भइसकेको छ ।
