जिल्ला समन्वय समिति (जिसस) कैलालीका प्रमुख सूर्यबहादुर थापाले सरकारी गाडी, इन्धन र जनशक्तिलाई निजी प्रयोजनमा लगाउने गरेको खुलासा गर्ने कर्मचारीलाई ज्यान मार्ने धम्की दिएको आरोप लागेको छ ।

सरकारी कर्मचारीलाई व्यक्तिगत काममा लगाउने, नमान्नेलाई जगिरबाटै निकाल्ने, स्पष्टीकरण सोध्ने, विभागीय कारवाहीको लागि मन्त्रालयलाई सिफारिस गर्ने लगायत कार्य गर्दै आएको रहस्य खुलाएका कर्मचारीलाई प्रमुख थापाले ज्यान मार्ने धम्की दिएको आरोप लागेको हो । 

व्यक्तिगत काममा लगाउँदा पछिल्लो समय जिसस प्रमुख थापा र कर्मचारीबीच मनमुटाव चुलिएकै बेला त्यसको विरोध गर्ने कर्मचारीलाई ज्यान मार्ने धम्की दिइएको आरोप लागेको छ । 

आफूले चाहे अनुसारको काम नगरेको भन्दै करार सेवामा कार्यरत हलुका सवारी चालक प्रेम नाथलाई सेवाबाट हटाइदिएको तथा लकडाउनको अवधिमा काम नगरेको भन्दै निमित्त समन्वय अधिकारी तथा शाखा अधिकृत सुनिल सागर जोशी र नायव सुब्बा वीरराम ताम्राकारलाई स्पष्टीकरण सोधेर चित्तबुझ्दो जवाफ नआएको भन्दै विभागीय कारवाहीको लागि संघीय मामिला तथा सामान्य प्रशासन मन्त्रालयलाई सिफारिस गरेपछि कर्मचारी र जिसस प्रमुख थापाबीच विवाद चुलिँदै गएको छ ।

जिसस प्रमुखको कार्यबाट असन्तुष्ट भएका नासु एवं कार्यालयका सूचना अधिकारी वीरराम ताम्राकारले कार्यालयको नियमित काम गर्दागर्दै पनि स्पष्टीकरण सोध्ने र पहुँचकै भरमा विभागीय कारवाहीको लागि मन्त्रालयलाई सिफारिस गरेको आरोप लगाएपछि उनले आफूलाई ज्यान मार्ने धम्की आएको बताएका छन् । थापाले गरिरहेका काम र हर्कतबारे सञ्चारमाध्यममा समाचार आएपछि आफूलाई ७–८ जना कर्मचारीकै सामुन्ने थर्काउँदै ज्यान मार्ने धम्की दिएको ताम्राकारले बताए ।

‘मिडियामा आउट भएपछि मलाई बोलाइयो । ७–८ जना भेला भएका थिए । मलाई थर्काउँदै तलाई देखाउँछु, हेर्छु, म व्यापारी हुँ, ठूलो कम्पनीको मालिक हुँ, त जस्तालाई म के गरिदिन्छु, फटाहाहरूलाई ठीक पार्छु भनेर धम्कीपूर्ण अभिव्यक्ति दिएपछि असुरक्षित महसूस गरेको छु,’ सूचना अधिकारी समेत रहेका ताम्राकारले भने, ‘ठूला व्यापारीले ज्यान मार्छु भन्नेसम्मको धम्कीपूर्ण अभिव्यक्ति दिनुभएको छ । आमसञ्चार जगतमा अनुरोध छ कि मेरो जीवन रक्षा गरिदिनु, मेरो जीवन बचाइदिनु ।’

पहुँच नभएका कर्मचारीको श्रमशोषण र पेटमा लात हान्ने काम हुँदै आएपछि आफूले त्यसको विरोध गर्दै आएको उनले बताए । आफूले लकडाउनमा काम गर्दागर्दै पनि कारवाही भोग्नुपर्ने अवस्था आएको सूचना अधिकारी ताम्राकारको गुनासो छ ।

‘कर्मचारीलाई कारवाही गर्ने, स्पष्टीकरण सोध्ने के कारवाही गर्ने भनेर निजामती कर्मचारी ऐनमा लेखिएकै छ । त्यो अधिकार नाघेर कानून हातमा किन लिनुपर्‍यो ?’ उनले भने, ‘हामी काम गरिरहेकै छौं । उहाँले २ जनालाई विभागीय कारवाही गर्छु, अर्को मान्छे ल्याउँछु भनेर चलखेल र प्रोपोगान्डा बनाउनुभयो । हामीले त्यसको विरोध गर्दा हामीलाई अहिले काम नगर्ने भनेर आरोप लगाइँदैछ । यो सरासर गलत हो । जनताको आँखामा छारो हाल्ने काम हो । मैले काम गरे/नगरेको त प्रमाणले बोल्छ नि !’

तर जिसस कैलालीका प्रमुख सूर्यबहादुर थापाले कुनै पनि आरोपमा सत्यता नभएको बताए । आफूले धनगढीमा पत्रकार सम्मेलन गरेर पत्रकारहरूले भिडियो रेकर्ड गरेको दाबी गर्दै थापाले सबै कर्मचारीले ताम्राकारविरुद्ध बोलेको बताए । ‘मैले धम्की दिएको छैन । तपाईंले पनि भिडियो हेर्नुहोला,’ थापाले भने ।
 
प्रमुख थापाले कोरोनाका बेला आफू विभिन्न स्थानमा पुगेपनि ताम्राकार कतै नभएको र ३ महिनादेखि क्वारेन्टीनमा छु भनेर काम नगरेको आरोप लगाए । ‘३ महिनादेखि क्वारेन्टीनमा छु भने फोन नै नउठाउने, हाम्रा नम्बर ब्ल्याक लिस्टमा राख्ने अनेक कुराहरू गरिरहेको छ । मेरो लिनुदिनु केही पनि छैन । मैले चाहेको कुरा हरेक मान्छेले आफ्नो जिम्मेवारी पूरा गर्नुपर्छ,’ उनले भने, ‘मैले कारवाहीका लागि लेखेर पठाएको हुँ । राज्यलाई ठगी खाने मान्छेलाई कारवाहीका लागि विभागलाई लेखिपठाएको छु ।’