पोखरामा एकपछि अर्को कोरोना संक्रमित थपिँदै गएका छन् ।

शुक्रबार बिहान २ जनामा कोरोना संक्रमण पुष्टि भएको दिउँसो पुनः ८ जनामा कोरोना देखिएको प्रदेश स्वास्थ्य निर्देशनालयले जनाएको छ ।

यसरी पोखरामा एकैदिन १० जनामा कोभिड–१९ पुष्टि भएको हो । स्वास्थ्य निर्देशक डा.विनोदबिन्दु शर्माका अनुसार पोखरा १९ मा ६ जना, वडा १५ र वडा ३१ मा एक एक जनामा संक्रमण देखा परेको हो ।

तीमध्ये ४–४ जना पुरुष र महिला छन् । क्षयरोग उपचार केन्द्र पोखरामा गरिएको पीसीआर परीक्षणमा पोखरा १९ का वर्ष ५८, ६८ र ८८ का ३ जना महिलामा कोरोना पुष्टि भएको हो ।

वडा १९ मै वर्ष ५७ का एक जना पुरुष तथा वर्ष ६० का २ जना पुरुषमा कोरोना देखिएको छ । यस्तै, वडा १५ मा वर्ष ३२ की महिला र वडा ३२ मा वर्ष १९ का पुरुषमा कोभिड–१९ देखिएको जनाइएको छ ।

पोखरामा शुक्रबार बिहान वडा २ र ८ मा गरी २ जनामा कोरोना संक्रमण देखा परेको विज्ञप्तिमार्फत जनाइएको थियो ।

बिहीवार पोखरा ८ मा एकै परिवारमा थप ४ जनामा कोरोना देखिएपछि त्यस क्षेत्रमा सतर्कता अपनाइएको छ ।

गण्डकीमा हालसम्म कोरोना संक्रमितको संख्या १ हजार ५ सय ८७ पुगेको छ । तीमध्ये १ हजार ३ सय ८३ जना निको भएका छन् । ४ जनाको मृत्यु भएको छ ।