राष्ट्रिय परीक्षा बोर्डले सोमवार १२ कक्षाको नतिजा सार्वजनिक गरेलगत्तै विभिन्न विश्वविद्यालयले स्नातक तहको भर्ना कार्यक्रम प्रारम्भ गर्न प्रतिस्पर्धा नै चलेको छ ।

सार्वजनिक नतिजाबाट झण्डै ४ लाख ३३ हजारभन्दा बढी विद्यार्थीलाई एकै पटक उच्च शिक्षामा ढोका खुलेपछि विश्वविद्यालयहरूले भर्ना कार्यक्रम शुरू गर्ने भएका हुन् ।

त्रिभुवन विश्वविद्यालयले स्नातक तहको शैक्षिक सत्र फागुनमा गर्ने निर्णय गरेको छ । शिक्षाध्यक्ष प्रा.डा. शिवलाल भुसालले स्नातक तहको शैक्षिक सत्र फागुनमा प्रारम्भ गर्ने निचोडमा विश्वविद्यालय पुगेको जानकारी दिए । विश्वविद्यालयले ३ महिनापछि सारेर भर्ना कार्यक्रम शुरू गर्ने भएको हो । यसअघि मंसिरमा स्नातक तहको पहिलो वर्षको भर्ना गर्ने गरिएको थियो ।

पोखरा विश्वविद्यालयले १२ कक्षाको नतिजा सार्वजनिक भएलगत्तै भर्ना शुरू गरिएको विश्वविद्यालयका उपकुलपति प्रा.डा. प्रेमनारायण अर्यालले जानकारी दिए । विश्वविद्यालय मातहतका कलेजले भर्ना कार्यक्रम जारी राखेको र अब नतिजा आएलगत्तै आङ्गिक क्याम्पसमा समेत भर्ना खोलिने जनाइएको छ ।

नेपाल संस्कृत विश्वविद्यालयले माघबाट स्नातक तहको भर्ना कार्यक्रम शुरू गर्ने निर्णय गरेको छ । संस्कृत विश्वविद्यालयमा शैक्षिक सत्र कहिलेबाट प्रारम्भ गर्ने भन्ने निर्णय विश्वविद्यालयको सभाबाट गर्ने परम्परा छ ।

विश्वविद्यालयका कूलसचिव माधव अधिकारीले माघबाटै स्नातक तहको पठनपाठन शुरू गरिने जानकारी दिए । विश्वविद्यालयले प्राकशास्त्री तह उत्तीर्ण गरेका विद्यार्थीलाई पुस महिनामै स्नातक तहमा भर्ना गरिसकेको छ ।

संस्कृत बाहेकका अन्य विषय अध्ययन गरेका ११ र १२ कक्षाका विद्यार्थीलाई ६ महिना संस्कृत अध्यापन गराएर स्नातक तहमा अध्ययनका लागि बाटो खुला गर्ने गरिएको छ । यसलाई प्राकशास्त्री तह भन्ने गरिएको छ । अब १२ कक्षा उत्तीर्ण गरेका विद्यार्थीलाई समेत भर्ना गरी माघबाटै पठनपाठन प्रारम्भ गरिने जनाइएको छ ।

१२ कक्षाको नतिजा सार्वजनिक भएलगत्तै मध्यपश्चिम विश्वविद्यालयले स्नातक तहका लागि भर्ना आह्वान गर्दैछ । विश्वविद्यालयका कूलपति प्रा.डा. नन्दबहादुर सिंहले स्नातक तहका कार्यक्रम माघबाटै प्रारम्भ गरिने जानकारी दिए । विश्वविद्यालयले स्नातक तहका सबै कार्यक्रम सेमेस्टर प्रणालीमा शुरू गर्ने गरेको छ ।

फागुनबाट स्नातक तहको शैक्षिक सत्र प्रारम्भ गरिने छ । कोरोना भाइरसको प्रभावका कारण केही महिना ढिला गरेर भर्ना कार्यक्रम शुरू गरिने भएको हो ।

आगामी ४ वर्षभित्र हाल बिग्रेको स्नातक तहको शैक्षिक सत्र मिलाउने योजना विश्वविद्यालयले बनाएको छ । गोरखापत्र दैनिकमा खबर छ ।