अमेरिकाको टेक्ससमा रहेको ३९४औं डिस्ट्रिक्ट कोर्टमा एक वकिल अचानक बिरालोमा परिणत भएपछि केही समयका लागि सुनुवाइ रोकिएको छ । 
 

जूम भिडियो कलमार्फत मंगलवार भएको सुनुवाइका क्रममा रड पोन्टन नाम गरेका ती वकिलले बहस गर्दा गर्दै बिरालोको चित्र भएको फिल्टर राख्न पुगे । उनलाई त्यो फिल्टर हटाउनै आएन । 

न्यायाधीश रोय फर्गुसनले उनलाई फिल्टर हटाउन लगाए । ‘हटाउने कोशिश गरिरहेका छौं,’ उनले भने । ‘म यहाँ लाइभ छु, म बिरालो हैन,’ उनले थपे । अनि उनले आँखा घुमाउँदा बिरालोको आँखा घुम्यो । 

‘हो, तपाईं बिरालो हैन,’ अर्का वकिल एच गिब्स बावरले बताए । 

आफ्नो इजलासमा कसैले पनि फिल्टर प्रयोग नगर्न न्यायाधीश फर्गुसनले चेतावनी दिए । 

यस्तो घटना भए पनि सबैले मर्यादा कायम गरेको भनी फर्गुसनले बताए पनि भिडियो हेरेर मानिस मरीमरी हाँसे ।