२७ असार २०८३, शनिबार
शैतानी जुत्ता बिक्रीमा राखिएपछि विश्वविख्यात जुत्ता कम्पनी नाइकले आर्ट कलेक्टिभ कम्पनीमाथि मुद्दा चलाउने भएको छ ।
सोमवार दायर गरिएको मुद्दामा नाइकले एमएससीएचएफ प्रोडक्ट स्टुडियो इन्कविरुद्ध आफ्नो प्रतिलिपि अधिकार उल्लंघन गरिएको आरोप लगाएको छ । उक्त संस्थाले नाइकका जुत्तालाई परिवर्तन गरेर ६६६ जोडा जुत्ता बिक्रीमा राखेको थियो । ती सबै जुत्ता सोमवार बिक्री भए ।
एमएससीएचएफले मुद्दाका विषयमा टिप्पणी गर्न मानेको छैन ।
मुद्दामा नाइकले अदालतलाई लिल नास एक्स शैतान जुत्ताको अनधिकारिक बिक्रीलाई स्थायी रोक लगाउन मागदाबी गरेको छ । यो विवादास्पद जुत्ताका कारण आफूले सामाजिक सञ्जालमा खप्की खानु परिरहेको नाइकको भनाइ छ ।
लिल नास एक्स गायक हुन् र उनी शैतानी जुत्ताका प्रवर्द्धक हुन् । नाइकले उनीविरुद्ध चाहिँ मुद्दा लगाएको छैन ।
नाइकको कालो र रातो एयर म्याक्स ९७ जुत्तामा तामाको पेन्टाग्राम (शैतानको चिह्न) जडान गरिएको छ अनि तलुवा (सोल) को बीचमा मानिसको रगत राखिएको छ । नाइकको जुत्तालाई आफैं तोडमरोड गरेर एमएससीएचएफले बिक्रीमा राखेको हो ।
यही कम्पनीले सन् २०१९ मा जिसस जुत्ता पनि निकालेको थियो ।
मुद्दाको फिरादपत्रमा नाइकले शैतान जुत्तामा नाइकको प्रसिद्ध लोगो उपयोग गरिएको बताएको छ ।
