२२ असार २०८३, सोमबार
अल्बानियाको राजधानीमा रहेको स्क्यान्डरबर्ग स्क्वेयरमा गाडी चलाउन नसकेर फनफनी घुमाउँदै अरूको ज्यान जोखिममा पार्ने चालकलाई एक व्यक्तिले उडेर कारभित्र पसी लात हानेको भिडियो सार्वजनिक भएको छ ।
अनेकौं क्यामराले खिचेको भिडियोमा कार फनफनी घुमेको अनि मानिसहरू हिँडिरहेको र आत्तिइरहेको देखिन्छ । देशमा आमनिर्वाचन कभर गर्न त्यति धेरै क्यामराहरू त्यहाँ राखिएका थिए ।
मानिसहरूले खुला ढोकाबाट चालकलाई समातेर रोक्न खोजेका थिए । तर उनले गाडी फनक्क घुमाउँदा ढोका बन्द भयो । त्यसपछि एकजना आएर चालकपट्टिको शीशाबाट हाम्फाले अनि कार रोके ।
प्रहरीका अनुसार, चालकले शहरका अन्य भागमा तीनवटा गाडीलाई ठोकेका थिए । उनले लागूऔषध सेवन गरेर कार चलाएको हुनसक्ने प्रहरीले जनाएको छ ।
