१८ असार २०८३, बिहीबार
भारतको मुम्बईमा रहेको एक पार्किङ स्पेसमा राखिएको कार अचानक खाल्डो बनेर त्यसैभित्र पसेको अनौठो भिडियो सार्वजनिक भएको छ ।
मुम्बईमा केही दिनयता भइरहेको अविरल वर्षाका कारण इनार पुरेर बनाइएको पार्किङ लटमा कार धसिएको हो ।
कारका मालिकले खिचेको भिडियोमा कार भुइँमा बनेको खाल्डोमा पसेको र मुनिको फोहर पानीमा चोपलिएको देखिन्छ ।
अधिकारीहरूले प्वाल परेको ठाउँबाट पानी पम्पले बाहिर फालेर कारलाई एक्स्क्याभेटरको सहायताले बाहिर निकालेका थिए ।
६७ वर्षीय डा किरण दोषीको कार इनारमा पसेको हो । उनले बताएअनुसार, कार पुछ्ने महादेव शिगवानले बिहान खाल्डो बनेको देखेका थिए ।
शिगवानले यसबारेमा सचेत गराएपछि किरण दौडिँदै त्यहाँ पुगेका थिए । उनकै कार खाल्डोमा पसेको देखेपछि उनले भिडियो खिचेका थिए ।
राम निवास कोलोनीका निवासीलाई पानी दिलाउने इनारमाथि पार्किङ लट बनाइएको हो ।
