कैलालीमा २२ वर्षीय युवक भूपेन्द्र बडुवाल हत्या प्रकरण अझै रहस्यकै गर्भमा छ । 

लम्कीचुहा नगरपालिका–१ का बडुवालको कात्तिक २३ गते राति टीकापुर नगरपालिका १ स्थित सिद्धार्थ होटलनजिकै हत्या भएको थियो । प्रहरीले अहिलेसम्म हत्याको चुरो पत्ता लगाउन सकेको छैन ।

धारिलो हतियार प्रहारबाट हत्या भएको घटनाको अनुसन्धान नेपाल प्रहरीको केन्द्रीय अनुसन्धान ब्यूरो (सीआईबी) ले गरिरहेको छ । प्रहरी निरीक्षक (इन्स्पेक्टर)को कमाण्डमा २ जनाको टोली अहिले कैलालीमा पुगेर अनुसन्धान गरिरहेको छ । 

‘केही अभियुक्तहरू पक्राउ परेका छन् । केही अझै फरार भएका छन् । हामीले अनुसन्धान गरिरहेका छौं,’ अनुसन्धानमा खटिएका एक प्रहरी अधिकारीले लोकान्तरसँग भने, ‘के कारणले भएको भन्ने कुराको चुरो खोज्दै छौं ।’

‘घटनाको सुक्ष्म अनुसन्धान र केही प्राविधिक पक्षको समेत विश्लेषण गर्नुपर्ने भएकोले सीआईबीको टोलीले अनुसन्धान जारी राखेको छ,’ कैलालीका प्रहरी प्रमुख तथा प्रहरी उपरीक्षक विश्व अधिकारीले लोकान्तरसँग भने, ‘ठूलो र जटिल घटना हो, अनुसन्धान पूरा भएपछि मात्रै सार्वजनिक गर्छौं ।’

अपराधको फल अपराध

प्रहरीले बडुवाल हत्या प्रकरणसँग कुनै अन्य आपराधिक घटनाको सम्बन्ध नरहेको जिकिर गरे पनि यो घटना अर्को आपराधिक घटनाले निम्त्याएको दुष्परिणामको रूपमा लिन थालिएको छ । 

खासमा नेपाली सेनाका सेनानी (मेजर) अशोकजंग शाहीसँगको लफडा, तोडफोड तथा कुटपिट प्रकरणलाई ढाकछोप गर्दाको दुष्परिणाम भएको प्रहरीको भनाइ छ ।

‘झट्ट हेर्दा मेजर शाही लफडा प्रकरण र हत्या प्रकरणको साइनो देखिँदैन । तर गम्भीर रूपमा यी दुई घटनालाई केलाउने हो भने हाल हत्या प्रकरणमा पक्राउ परेका आरोपित, ती आरोपितहरूको मेजर शाही घटनामा प्रत्यक्ष संलग्नता र त्यो सार्वजनिक अपराधको घटनालाई ढाकछोप तथा मिलापत्रमै टुंग्याएपछि आपराधिक समूहको मनोबल बढेको स्पष्ट देखिन्छ,’ मृतक बडुवालका आफन्त महेश बडुवालले लोकान्तरसँगको कुराकानीमा भने, ‘यदि मेजर शाहीको घटनामा संलग्न सबैलाई नियन्त्रणमा लिएको भए यो हत्या प्रकरण टर्न सक्थ्यो । यसमा प्रहरी चुकेको देखिन्छ ।’

के थियो मेजर शाही प्रकरण ?

बडुवाल हत्या घटनाभन्दा ठीक दुई दिनअगाडि कात्तिक २१ गते राति करीब १० बजे मेजर शाही मदिराले मात्तिएर लम्की चुहानगरपालिका– ३ चिसापानीस्थित संगम होटलमा पछाडिबाट पसेका थिए ।

जान खोजेको भन्दा अर्कै होटलमा त्यही पनि बन्द भइसकेको अवस्थामा उनी प्रवेश गरेका थिए ।

लम्कीचुहा नगरपालिका–३ गोराङ्गेस्थित सुदूरपश्चिम पृतना तालिम शिक्षालयका सेनानी (मेजर) रहेका उनले त्यहाँ आफ्नो पदीय रवाफमा स्थानीय तथा होटल सञ्चालकमाथि मुख छाडेपछि उनी चढेको गाडी र इलाका प्रहरी कार्यालयमा तोडफोड भयो । 

आक्रोशित मानिसहरू १६ टाँका लगाउनुपर्ने गरी शाहीको टाउकोमा ढुंगा बसाए ।

मेजर शाहीको आचरण विपरीतको हर्कत र बदलामा शाहीमाथि ज्यानै जाने गरी कुटपिट, प्रहरी कार्यालयमा तोडफोडसहितको घटनामा प्रहरी चुपचाप बस्यो ।

न पदीय रवाफ प्रदर्शन गर्ने शाहीमाथि कुनै मुद्दा चलाइयो, न त प्रहरी कार्यालय र गाडी तोडफोड गर्नेमाथि मुद्दा चलाइयो । 

फिल्मी शैलीमा राजनीतिक दल, जनप्रतिनिधि, त्यहाँका भद्रभलादमी र प्रहरी सबै मिलापत्र गराउन र दोषीलाई जोगाउनमै केन्द्रित भए ।

आफ्नो कार्यालय नै तोडफोड हुँदा पनि प्रहरीले त्यो घटना मिलापत्रमा टुंग्याउन भूमिका खेल्यो ।

इलाका प्रहरी कार्यालय लम्कीमा कार्तिक २२ गते भएको छलफलपछि मेजर शाहीले आफू अर्कै होटल (होटल लुक्स) पस्न खोजेको तर अर्कै होटल पसेको भन्दै घटनाप्रति क्षमा मागे । 

तोडफोड भएको गाडी मेजर शाहीले आफैं बनाउने र इलाका प्रहरी कार्यालय भवनमाथि भएको तोडफोडको जिम्मा तोडफोड गर्ने समूहले लिने सहमति बन्यो । आपसमै मर्मत गर्ने सहमतिपछि घटना नै टुंग्याइयो । कसैले कसैमाथि मुद्दा नचाउने सहमति गरे । त्यसताका कसैविरुद्ध उजुरी नपरेको भन्दै जिल्ला प्रहरी कार्यालय कैलालीले घटनालाई नै नजरअन्दाज गर्‍यो ।

तर जब बडुवाल हत्या प्रकरणले प्रहरीको अनुसन्धानलाई झन्–झन् जटिल र गिजोल्न थालेपछि प्रहरी अधिकारीहरू पुर्पुरोमा हात लगाउनुपर्ने अवस्थामा छन् ।

यहाँसम्म कि मेजर शाही कुटपिट तथा प्रहरी कार्यालय तोडफोड घटनामा प्रत्यक्ष संलग्न रहेका त्यही संगम होटलका सञ्चालक नवीन रावल र आफन्त धीरज शाहीलगायत मुछिएपछि प्रहरी नै छक्क परेको छ । रावल हालसम्म फरार छन् ।

यहाँसम्म कि लम्की र टीकापुर क्षेत्रमा बडुवाल हत्या हुनुभन्दा पहिले नै मेजर शाही घटनामा मुछिएका रावल र अर्को गरी दुई समूहबीच ग्याङ फाइट हुने सूचना प्रहरीलाई थियो । तर ती सबै सूचना र घटनाक्रमलाई प्रहरीले नजरअन्दाज गर्दा यो अवस्था आएको छ ।

प्रहरीको भूमिकामाथि आशंका

फरार आरोपितमध्ये दुईजना प्रहरी निरीक्षक र प्रहरी नायब उपरीक्षकका आफन्त छन् ।

विगतदेखि नै राजनीतिक दलले संरक्षण गर्दै आएका व्यक्ति पनि फरार छन् । सोही कारण प्रहरीको भूमिकामाथि पनि शंका लागेको मृतक भूपेन्द्रका आफन्त भगत बडुवाल बताउँछन् ।

‘प्रहरीले अनुसन्धान गरेर अपराधीलाई समात्न सकेन,’ उनले भने, ‘मुख्य योजनाकार अझै फरार छन् । प्रहरीको भूमिकामाथि नै शंका लाग्न थालेको छ ।’

घटनामा संलग्न रहेकाको पहिचान हुँदा पनि उनीहरूलाई पक्राउ गर्न कैलाली प्रहरी असफल भएको पीडित पक्षको गुनासो छ । फरार आरोपित कैलाली आसपासकै जिल्लामा रहेको बताउँदै आएको प्रहरीले पक्राउ गर्न भने सकेको छैन । 

पीडित परिवारका अनुसार घटना भएको समयमा प्रहरीले सक्रियता देखिए पनि पछिल्लो समय भने सुस्ताएको गुनासो छ ।

१६ जनाविरुद्ध उजुरी

जिल्ला प्रहरी कार्यालय कैलालीका अनुसार सो घटनामा १६ जना विरुद्ध जाहेरी परेको छ । हालसम्म ९ जनालाई पक्राउ गरी अनुसन्धान अगाडि बढाइएको छ ।

शुरूमा आठजना पक्राउ परेकामा कात्तिक २८ गते प्रहरीले थप एक जनालाई पक्राउ गरेको थियो । अनुसन्धानका क्रममा प्रहरीले कात्तिक २८ गते लम्कीचुहा–५ का विकास खड्कालाई पक्राउ गरेको हो ।

घटनाको भोलिपल्ट अर्थात् कात्तिक २४ गते प्रहरीले आठ जनालाई पक्राउ गरेको थियो । 

पक्राउ पर्नेमा लम्कीचुहा नगरपालिका–३ चिसापानीका २४ वर्षीय महेश रावल, २० वर्षीय आर्यन देवकोटा, २० वर्षीय धीरज शाही, लम्कीचुहा नगरपालिका–१ का २२ वर्षीय कपिल श्रेष्ठ, १८ वर्षीय किशोर, टीकापुर नगरपालिका–१ का २३ वर्षीय प्रविन रिमाल, २१ वर्षीय रोहित आले र २६ वर्षीय सोहन शाह रहेका छन् । बाँकी फरार छन् ।