०२ साउन २०८३, शनिबार
विराटनगरस्थित नोबेल शिक्षण अस्पतालमा पुनः ईआरसीपी सेवा शुरू भएको छ ।
कोरोनाका कारण करीब दुई वर्ष यता स्थगित भएको यो सेवा अहिले पुनः शुरू भएको हो ।
पित्त नलीको पथरिया विना चिरफार निकाल्न थालिएको छ । मुखबाट इण्डोस्कोप छिराएर पित्त नलीमा भएको पथरिया विना चिरफार निकाल्ने विधि नै ईआरसीपी हो ।
सामान्यतया पित्त नलीको ढुंगा पेट र पित्त नली दुवै चिरेर निकाल्ने गरिन्छ । ल्याप्रोस्कोपिक विधिबाट पनि पित्त नली चिर्नैपर्ने बाध्यता हुन्छ । तर, ईआरसीपी विधिमार्फत विना चिरफार मुखबाट इण्डोस्कोप छिराएर ढुंगा निकाल्ने गरिन्छ ।
यो विधि विरामीका लागि निकै सहज र फाइदाजनक मानिन्छ । नेपालका केही अस्पतालहरूमा मात्र प्रयोगमा रहेको यो उपचार पद्धति नोबेलले पूर्वी नेपालमै पहिलो पटक २०७५ सालबाट प्रयोगमा ल्याएको थियो । तर, कोरोनाको महामारी फैलिएपछि यो सेवा अवरुद्ध भयो ।
कोरोनाको प्रभाव घटेपछि अहिले डा. मोहन खड्का र डा.अमित भट्टराईसहितको टिमले पुनः ईआरसीपी शुरू गरेको अस्पतालले जनाएको छ ।
पित्त नली चिरेर ढुंगा निकाल्दा निको हुन बढी समय लाग्ने, चिरेको ठाउँमा सिलाउन गाह्रो हुने, संक्रमणको खतरा हुने लगायत समस्या हुन सक्ने चिकित्सकहरु बताउँछन् । तर, ईआरसीपी विधिमार्फत मुखबाट इण्डोस्कोप छिराई ढुंगालाई तानेर निकालिने हुनाले बिरामीलाई खासै असर नपर्ने चिकित्सकको भनाइ छ । ‘बिरामी छिटै निको हुने हुनाले अस्पतालको बसाइ, बाह्य असर र खर्च पनि कम हुन्छ,’ डा.भट्टराईले भने, ‘पित्त नलीको ढुंगा निकाल्न ईआरसीपी विधि एकदमै प्रभावकारी हुन्छ ।’
पित्त नलीमा क्यान्सर वा ढुंगा बसेर जण्डिस भएका बिरामीको उपचार र आन्द्राको क्यान्सर तथा पैंक्रियाजको क्यान्सर पत्ता लगाउन पनि यो विधि लाभदायी हुने चिकित्सकहरू बताउँछन् ।
