११ साउन २०८३, सोमबार
नेपाल राष्ट्र बैैंकका गभर्नर महाप्रसाद अधिकारी निलम्बनको असर शेयर बजारमा परेको छ ।
सरकारले शुक्रवार गभर्नर अधिकारीलाई निलम्बन गरेपछि पहिलो दिनको कारोबारमा शेयर बजार ४४.६४ अंकले घटेको छ ।
शनिवार र आइतवार बिदा भएका कारण सोमवारको प्रिओपनिङदेखि नै घट्दै गएको शेयर बजार दिनभरमा १.८१ प्रतिशतले घटेको छ ।
राष्ट्र बैंकले चालू आवमा ल्याएको शेयर धितो कर्जामा न्युनतम ४ करोड र अधिकतम १२ करोड रुपैयाँको सीमा तोकेपछि शेयर बजारमा परेको असरका कारण बजार उल्लेख्य रूपमा बढ्न सकेको थिएन ।
गभर्नर अधिकारीको निलम्बनपछि पनि लगानीकर्तामा निराशा बाँकी नै रहेको आजको शेयर बजारको अवस्थाले देखिएको छ । जसको फलस्वरूप सोमवारको शेयर बजार मापक नेप्से परिसूचक घटेर २४१९.७१ अंकमा आइपुगेको छ ।
सोमवार २३३ कम्पनीको ५० लाख ९५ हजार कित्ता शेयरको ४० हजार पटक कारोबार भएको छ । यसबाट २ अर्ब २६ करोड रुपैयाँको कारोबार भएको छ ।
सोमवार बजार घटेको दिनपछि नेस्डो समृद्ध लघुवित्त वित्तीय संस्थाको शेयर मूल्यमा सकारात्मक सर्किट लागेको छ । यसका लगानीकर्ताले सोमवार १० प्रतिशत कमाएका छन् ।
जाल्पा सामुदायिक लघुवित्त वित्तीय संस्थाका लगानीकर्ताले ९.९९ प्रतिशत र महिला लघुवित्त वित्तीय संस्थाका लगानीकर्ताले पनि २.६९ प्रतिशतले कमाएका छन् ।
सोमवार गुमाउने कम्पनीहरू माइमर्जिङ नेपालका लगानीकर्ताले ९.९८, राष्ट्र उत्थानकाले ९.९२ प्रतिशत गुमाएका छन् । नेपाल टेलिकमको ६.१२, हिमालयन पावरले ५.६३, नेपाल लाइफ इन्स्योरेन्सका लगानीकर्ताले ५.०५ प्रतिशत गुमाएका छन् ।
सोमवार सबैभन्दा बढी रकम कारोबार हुनेमा नेपाल लाइफको १६ करोड ५२ लाख रुपैयाँ छ । यसको शेयरको सोमवार २ हजार ३२९ पटक कारोबार भएको छ ।
