पश्चिम नवलपरासीको सुनवल नगरपालिकामा गठबन्धलाई पराजित गर्दै एमालेका उम्मेदवार विजयी भएका छन् । 

मेयरका उम्मेदवार विमला अर्यालले नेपाली कांग्रेसका उम्मेदवार अर्जुनकुमार पोखरेललाई ३ हजार २१८ मत अन्तरले पराजित गरेर विजयी भएकी हुन् ।

अर्यालले १४ हजार ८३८ ल्याउँदा पोखरेलले ११ हजार ६२० मत ल्याए । उनी लुम्बिनी प्रदेशकै पहिलो महिला मेयर बनेकी हुन् । पराजित पोखरेल कांग्रेसका जिल्ला सभापति समेत हुन् ।

उपमेयरमा पनि एमालेकै सूर्यप्रसाद दुबे विजयी भएका छन् । दुबेले माओवादी केन्द्रका लेखनाथ खरेललाई ४ हजार ९०८ मतान्तरले पराजित गरेर विजयी भएका हुन् ।

दुबेको १३ हजार ७९८ र खरेलको ८ हजार ८९० मत छ । त्यहाँ कांग्रेस र माओवादी केन्द्रले गठबन्धन गरेका थिए । यसअघिको निर्वाचनमा कांग्रेसले मेयर र एमालेले उपमेयर जितेको थियो । १३ वडा रहेको सुनवलका ७ वडा एमाले, ५ वडा नेपाली कांग्रेस र १ वडा माओवादी केन्द्रले जितेको छ ।