वैशाख ३० गते सम्पन्न स्थानीय तहको निर्वाचनको मतगणना जारी छ । बिहीबार दिउँसोसम्म ५ सय ७० स्थानीय तहको नतिजा आएको निर्वाचन आयोगले बताएको छ । 

अहिलेसम्म आएको नतिजाअनुसार २९ हजार ३०३ जना जनप्रतिनिधि निर्वाचित भएका छन् । सबै स्थानीय तहको नतिजा आउँदा ३५ हजार २२१ जनप्रतिनिधि निर्वाचित हुने निर्वाचन आयोगका प्रवक्ता शालिग्राम शर्मा पौडेलले बताए । 

बिहीबारसम्म १७४ नगरपालिकाका प्रमुख, उपप्रमुख, ३९६ गाउँपालिकामा अध्यक्ष र उपाध्यक्ष निर्वाचित भएर आयोगमा विवरण प्रविष्ट भइसकेको पौडेलले बताए । 

आयोगका अनुसार, बिहीबार दिउँसोसम्म ५ हजार ६५९ वडाध्यक्ष, ५ हजार ६५३ महिला सदस्य ५ हजार ५५६ दलित महिला  सदस्य र १ हजार २९५ जना वडा सदस्य निर्वाचित भएका छन् । 

कानूनअनुसार, जेठ ५ गते स्थानीय तहका जनप्रतिनिधिको अन्तिम कार्यकाल हुने भए पनि मतगणना ढिलो हुँदा नयाँ निर्वाचित जनप्रतिनिधिले पदभार ग्रहण गर्न पाएका छैनन् । 

 ‘मतगणना टोली बढाएर यथाशाक्य छिटो मतगणनाको कार्य सम्पन्न गर्न यसअघि नै निर्देशन दिइसकिएको छ,’ पौडेलले भने, ‘छिटोभन्दा छिटो मतगणना सम्पन्न गराउन हामी अझै पनि प्रत्यत्नशिल छौं ।’

मतदान र मतगणनाको क्रममा कानून विपरित अनियमितता गर्नेहरुलाई पक्राउ गरी निर्वाचन कसुर ऐन अन्तर्गत कारबाही गर्न आयोगले गृह मन्त्रालयलाई निर्देशन दिएको पनि पौडेलले जानकारी दिए ।