२३ असार २०८३, मंगलबार
मोरङमा चैते धान उत्पादनमा वृद्धि भएको छ । गत वर्षभन्दा यस वर्ष दुई हजार १९६ मेट्रिकटन बढी धान उत्पादन भएको कृषि ज्ञान केन्द्र मोरङले जनाएको छ । चैते धानको उत्पादन बढेपनि मूल्यमा गिरावटका कारण किसानले गुनासो गरेका छन् ।
जिल्लामा गत वर्ष एक लाख एक हजार ३७४ दशमलव १० मेट्रिकटन धान उत्पादन भएकोमा यस वर्ष वृद्धि भई एक लाख तीन हजार ५७० दशमलव ६० मेट्रिकटन उत्पादन भएको कृषि ज्ञान केन्द्रका सूचना अधिकृत आदर्श सिंहले जानकारी दिए ।
गतवर्ष १७ हजार ७५५ हेक्टर जमिनमा चैते धान लगाइएकोमा यस पटक वृद्धि भई १७ हजार ८५७ हेक्टर पुगेको उनले बताए । गत वर्ष ५ दशमलव ७१ उत्पादकत्व भएकोमा यसवर्ष वृद्धि भई ५ दशमलव ८० पुगेको हो ।
अघिल्लो साल चैते धानको मूल्य प्रतिक्विन्टल दुई हजार सात सयसम्म पुगेकोमा यस वर्ष घटेर प्रतिक्विन्टल दुई हजार रुपैयाँसम्ममा कारोबार भइरहेको रङ्गेली नगरपालिका–१ का किसान चन्द्र अधिकारीले बताए ।
चैते धानले लगानी पनि नउठेको गुनासो गर्दै बेलबारी–९ नलबारीका किसान नरबहादुर कटुवालले भने, “भण्डारणको समस्याले गर्दा पनि धान सस्तोमा बेच्नुपरेको छ । किसानको पहुँचमा भण्डारण हुनेथियो भने यति सस्तोमा धान बेच्नुपर्ने थिएन ।”
कृषि ज्ञान केन्द्रका अनुसार १७ पालिकामध्ये सुन्दरहरैँचा, बेलबारी, पथरीशनिश्चरे, उर्लाबारी, कानेपोखरी, रतुवामाई, सुनवर्षी, रङ्गेली र जहदा क्षेत्रमा विशेषगरी चैते धानको खेती हुँदै आएको छ।
