लामो समय नेपाली कांग्रेसको राजनीति गरेका गयाप्रसाद बरईले यो पटक पार्टीबाट टिकट ल्याएर चुनाव लड्ने तयारी थिए । जब स्थानीय तहको निर्वाचन मुखैमा आयो, कांग्रेसले उनलाई पत्याएन । 

पार्टीले उनलाई टिकट नदिएर ज्ञानप्रकाश मिश्रलाई दियो । बरईले टिकटका लागि पटक–पटक पुनर्विचार गर्न आग्रह गर्दा पनि पार्टीले कुनै सुनुवाइ गरेन । 

रूपन्देहीको दक्षिणी मधेश बाहुल क्षेत्र हो, मर्चवारी गाउँपालिका । यहाँका गाउँवासीले उनलाई जनप्रतिनिधि भएर सेवक बनेको देख्न चाहन्थे । 

जनताको चाहना र आफ्ना इच्छालाई उनले मर्न दिएनन् । कांग्रेस छाडेर उनी हृदयेश त्रिपाठी नेतृत्वको जनता प्रगतिशील पार्टीमा प्रवेश गरेर गाउँपालिकाको अध्यक्षमा उम्मेदवारी दिए । 

जनताको सुख दुःखमा रमाउँदै आएका बरईले दुई साता चुनाव प्रचारमा खटिएर आफ्नो पुरानो पार्टीका उम्मेदवारलाई पराजित गरी गाउँपालिकाको अध्यक्षमा निर्वाचित भएका छन्् । 

बरईले कांग्रेसका उम्मेदवार ज्ञानप्रकाश मिश्रालाई एक हजार १४० मतान्तरले पराजित गरे । बरईले ४ हजार ३८५ मत प्राप्त गरे भने उनका निकटतम् प्रतिद्वन्द्वी मिश्राले ३ हजार २४५ मत प्राप्त गरे ।

मर्चवारी नै जनता प्रगतिशीलले जितेको रुपन्देहीको एक मात्र पालिका हो । जनता प्रगतिशीललाई यो सफलता दिलाउने ४५ वर्षीय गया समाजसेवामा पनि सक्रिय थिए । 

उनको चुनाव चिह्न काँधमा कोदालो बोकेको किसान हो । बरईसँगै गाउँपालिका उपाध्यक्षमा पनि जनता प्रगतिशील पार्टीकै उम्मेदवार आशा सिंह विजयी भएकी छन् । 

कांग्रेस उम्मेदवार सुमन यादवलाई ५५६ अन्तरले पराजित गर्दै उनी विजयी भएकी हुन् । 

सिंहले २ हजार ९६५ मत प्राप्त गरिन् भने उनका निकटतम प्रतिद्वन्द्वी कांग्रेसकी उम्मेदवार यादवले २ हजार ४०९ मत प्राप्त गरिन् । 

त्यस्तै मर्चवारी गाउँपालिका वडा नम्बर ५ मा पनि जनता प्रगतिशील पार्टीका उम्मेदवार कुष्णकुमार सिंह ५४४ मत प्राप्त गरी वडाध्यक्षमा निर्वाचित भए । बरईले गाउँपालिकाको विकासका लागि आफू लागिपर्ने बताए । उनले जनताको अमूल्य मतबाट आफू निर्वाचित भएकाले जनताको पक्षमा काम गर्ने बताए ।