०५ साउन २०८३, मंगलबार
‘सिमसिमे पानीमा’, ‘पानको पात’, ‘बाँझो खेतमा’ जस्ता थुपै्रै हिट गीत दिएका लोक गीतका हस्ती प्रेमराजा महत २ दशकभन्दा लामो समयदेखि अमेरिकामा बस्दै आएका छन् ।
तर उनको नेपाल आउजाउ भने बाक्लै हुने गरेको छ । नेपाल आएको समयमा गीतसंगीतमा पनि उनी उत्तिकै सक्रिय हुने गरेका छन् । ७ महिना अगाडि नेपाल आगमनको क्रममा उनले ‘बन्दिपुरैमा’ बोलको गीत सार्वजनिक गरेर फर्किए ।
शान्तिश्री परियारसँगको स्वर रहेको गीतको भिडियोमा महत स्वयंमले अभिनय गरेका थिए ।
जुन गीतको भिडियोले अहिले यूट्युबमा ८५ लाख भ्युज कटाइसकेको छ । उनै प्रेमराजा केही हप्तादेखि नेपालमा थिए र बुधवार साँझ अमेरिका फर्किएका छन् ।
अमेरिका फर्किनुअघि बुधवार दिउँसो राजधानीमा एक कार्यक्रमबीच उनको स्वर र अभिनय रहेको ‘पीपल डाँडे साइँली’ बोलको गीत सार्वजनिक गरियो ।
गीतमा महत र अस्मिता परियारले स्वर दिएका छन् । भिडियोमा गायक महतले निर्देशक एवं अभिनेत्री दीपाश्री निरौलासँग जोडी बाँधेका छन् ।
कार्यक्रमपश्चात लोकान्तरसँगको छोटो कुराकानीमा गायक महतले अहिले आफूले भिडियोमा अभिनय गर्नुको कारणबारे खुुलाए । ‘पहिले गीत सुनिन्थ्यो । अहिले गीत हेर्नेमा परिणत भयो,’ महतले भने, ‘त्यसका लागि त आफू भिडियोमा आउनुपर्यो । सोही कारण अभिनय गरेको हुँ ।’ यद्यपि आफू प्रसिद्ध हुनका लागि नभई समयको मागसँगै सुन्ने गीतलाई हेर्नका लागि मात्रै अभिनय गरेको बताए ।
उनले यस पटकको नेपाल आगमनमा अन्य केही गीतहरू समेत गाएको बताए । ‘अन्जु पन्तदेखि शान्तिश्री परियार लगायतसँग गीत गाएको छु,’ महतले भने, ‘क्रमशः ती गीतहरू सार्वजनिक हुनेछन् ।’
महतले यसअघि नेपाल आउँदा तयार पारेको ‘बन्दिपुरैमा’मा शान्तिश्रीसँग सहकार्य गरेका थिए । उनीसँग यसपटक हुम्ला, जुम्ला र रोल्पा, डोल्पाको ठेट भाकामा आधारित रहेर लोकगीत रेकर्ड गराएको उनले बताए । अञ्जु पन्तसँग भने लोकगीतमा आधारित थोरै आधुनिक लय मिसिएको गीत गाएको महतले बताए ।
‘असोजमा फेरि नेपाल आउनेछु । त्यतिञ्जेलसम्मलाई पुग्ने गीत रेकर्ड गराएको छु,’ महतले भने, ‘त्यतिबेला आएर फेरि अन्य गीतहरू ल्याउनेछु ।’
