ललितपुर महानगरपालिका–३ ले २४सै घण्टा सञ्चालन हुने एआई कलिङ सेवा सुरु गरेको छ ।

वडा कार्यालयले मंगलबार पत्रकार सम्मेलन गर्दै ‘तपाईंको समस्या, मेरो समाधान’ नारासहित सुरु गरिएको सेवामार्फत वडाले प्रदान गर्ने सबै सेवाबारे जानकारी लिन र गुनासो दर्ता गर्न सकिने जनाएको छ।

वडाध्यक्ष श्रीगोपाल महर्जनले एआई कलिङमार्फत नागरिकले जुनसुकै समयमा सेवा सम्बन्धी जानकारी पाउने र जनप्रतिनिधि वा कर्मचारीसँग प्रत्यक्ष सम्पर्क हुन नसकेको अवस्थामा पनि समस्या समाधानका लागि सहजीकरण हुने बताए।

ब्लु ओभल इन्टरनेशनलका प्रतिनिधि तथा प्रविधि विकासकर्ता प्रदीप श्रेष्ठले नागरिक र स्थानीय सरकारबीचको समन्वय सहज बनाउन एक महिनाको तयारीपछि यो प्रविधि विकास गरिएको जानकारी दिए।

हाल एआई कलिङ सेवाले नेपाली भाषामा आवश्यक सूचना उपलब्ध गराउनुका साथै अनलाइनमार्फत आवाज र लिखित रूपमा गुनासो दर्ता गर्न सक्ने सुविधा दिएको छ। वडा कार्यालयका अनुसार मल्टिपल एलएलएममा आधारित यो प्रणालीमा आगामी दिनमा अन्य भाषासमेत थपिनेछन्।