अमेरिकाको खाद्य तथा औषधि व्यवस्था विभागले महमा भियाग्रा मिसाएर बेचबिखन गरिरहेका चार कम्पनीलाई चेतावनी पत्र पठाएको छ । ती कम्पनीहरूले महमा भिगाग्रा तथा ‘सियालिस’जस्ता लागुपदार्थ मिसाएर बेचिरहेका थिए । जसको जानकारी उनीहरूले उत्पादन लेबलमा उल्लेख गरेका थिएनन् । 

उनीहरूले बजारमा ती सबै उत्पादन यौन शक्ति बद्र्धक भन्दै अलग–अलग नाममा बेचिरहेका थिए । 

महमा अन्य वस्तु मिसाउँदा स्वास्थ्यका लागि हानिकारक हुने भन्दै विभागले ति कम्पनीहरूलाई चेतावनी पत्र पठाएको हो । विभागले ‘युएस टायल हनी एलएलसी, एमकेएस इन्टरप्राइस एलएलसी, शापेक्स डट कम र वन एम युएसए इन्कोर्पोरेटेड डीबीए प्लेजर पोडक्ट’ नामक कम्पनीलाई चेतावनी पत्र पठाइएको हो । उनीहरूले अलग–अलग वेबसाइटमार्फत मिसावट गरिएको मह बेचिरहेका थिए । 

ति कम्पनीहरूले ‘डोज भाइटल हनी फर मेन’, ‘सिक्रेट मिरेकल रोयल हनी फर हर्स’, ‘किंगडम हनी रोयल भीआईपी’लगायतका नाममा मह बेचेको बताइएको छ । 

अमेरिकामा भियाग्रा र ‘सियालिस’लाई लागुपदार्थको सूचीमा समावेश गरिएको छ । यसको प्रयोग नपुंसकताको समस्या भएका पुरुषको उपचारमा गर्ने गरिन्छ । यसको प्रयोग चिकित्सकको सल्लाहबिना गर्न नहुने विज्ञहरूको भनाइ छ । 
आईएफटी साइन्सका अनुसार ‘भियाग्रा’ र ‘सियालिस’जस्ता औषधिहरू जानाजानी सेवन गर्नु निकै खतरनाक सावित हुन सक्छ । भियाग्राले ‘पीडीई फाइभ’ नामक इन्जाइमको कार्यलाई रोक्छ । ‘पीडीई फाइभ’ गतिविधि अवरुद्ध हुँदा रक्त कोशिकाहरू निश्क्रिय हुने र जसले गर्दा रक्त प्रवाह बढ्ने तथा रक्तचाप न्यून हुने गर्दछ ।