०९ साउन २०८३, शनिबार
उपाय सिटी कार्गोले ‘उपाय फुलफिल्मेन्ट सर्भिस’ कार्यक्रम सार्वजनिक गरेको छ ।
कम्पनीले बुधवार एक कार्यक्रम आयोजना गरी नयाँ योजना सार्वजनिक गरेको हो ।
‘उपाय अन डिमाण्ड’ र ‘मेरो उपाय’ जस्ता सेवाहरूको सफलता पछि तेस्रो सर्भिसको रुपमा उपाय फुलफिलमेन्ट सर्भिसलाई ल्याएको कम्पनीले जनाएको छ ।
कम्पनीले आफ्नो नयाँ ‘उपाय फुलफिल्मेन्ट सर्भिस’ योजना अन्तर्गत एक्कै साथ धेरै ठाउँमा सामान डेलिभरी गर्न सकिने जनाएको छ ।
यो सेवा प्रदान गर्न उपायले रुट प्लानिङ सिस्टमको प्रयोग गर्दछ जसले ढुवानीमा लाग्ने समय र पैसा दुबैको बचत हुन्छ ।
यसको सोझै फाइदा ग्राहकलाई कम ढुवानी शुल्क र छिटो सामान डेलिभरी मार्फत पर्न जाने कम्पनीले जनाएको छ ।
कम्पनीका अनुसार, रुट प्लानिङ सिस्टमले सामानको डेलिभरी गर्नुपर्ने ठाउँ अनुसार प्याकेजलाई छुट्याउँछ र सोही अनुरूप डेलिभरी जान्छ ।
यसका साथै उपाय फुलफिल्मेन्ट सर्भिस मार्फत एकैसाथ धेरै सामानको पिकअप, सोर्टिङ र बन्ड्लिङ, र डेलिभरी गर्न सकिने कम्पनीले जनाएको छ ।
ग्राहकको सहजताको लागि कम्पनीले आफ्नै मोबाइल एप सञ्चालन गरेको छ, जसको प्रयोग गरी ग्राहकले सजिलै भुक्तानी गर्न सक्ने कम्पनीको भनाइ छ ।
उपायले आगामी दिनमा नेपालका ३०० सहरमा आफ्नो डेलिभरी सेवा पुर्याउने योजना लिएको कम्पनीका एमडी सुमन रायमाझी भन्छन् ।
