काभ्रे, १३ साउन– गत शुक्रबार काभ्रेको बनेपामा एकै परिवारका चार जना मृत अवस्थामा भेटिए । त्यसको पाँच दिन नवित्दै विहीबार धुलिखेल नगरपालिका वडा नम्बर ८ मा एक जोडी दम्पती ले एउटै रुखमा झुण्डिएर आत्महत्या गरे ।
आफैले लगाएको पाईन्ट र सल जोडेर पासो बनाई एउटै पासोमा धुलिखेल ८ घर भएका भैरव भनिने सोमप्रसाद बडाल र उनकी कान्छी श्रीमती मनिषा दाहालले आत्महत्या गरेको जिल्ला प्रहरी कार्यालय काभ्रेले जनाएको छ ।
२८ बर्षका सोमप्रसादकी जेठी श्रीमती विद्यालयकी शिक्षिका हुन् । एक छोरा र एक छोरीका बाबु सोमप्रसादले केही दिन अघि मात्रै धुलिखेल वडा नम्वर २ रविगाउँ घर भई बनेपाको एक सहकारीमा कार्यरत कक्षा १२ मा अध्ययनरत १९ वर्षीया मनिषासँग विवाह गरेका थिए ।
सोमप्रसादले दोस्रो विवाह गरेसँगै उनको परिवारमा सम्पति विवाद भयो ।
एक दुग्ध डेरीका सवारी चालकको रुपमा काम गर्ने सोमप्रसादकी जेठी श्रीमतीले प्रहरीकोमा मंगलबार मात्रै उजुरी दिएकी थिईन् ।
कान्छी श्रीमती नलिई सोमप्रसाद जिल्ला प्रहरी कार्यालय काभ्रेमा पुगेका थिए । बुधबार जेठी श्रीमती टिकादेवी र सोमप्रसादबीच भएको सम्पत्ति आधा गर्ने सहमति भएको थियो भने श्रीमतीलाई कुटपिट र हिंसा नगर्ने मिलापत्र प्रहरी कार्यालयमा भएको थियो ।
सोमप्रसादले आफ्नो नाममा रहेको आधा जग्गा टिकादेवीलाई पास गरिदिने सहमति अनुसार बुधबार दिउँसो घर गएका थिए ।
सोमप्रसाद कान्छी श्रीमती मनिषालाई लिएर राति घरबाट निस्किए ।
बिहीबार दिनभर आफन्तले उनको खोजी ग-यो तर फेला परेनन् । घाँस काट्न गएका स्थानीयले बिहीबार दिउँसो चारबजे सोमप्रसाद र मनिषालाई अर्धनग्न अवस्थामा झुण्डिएको अवस्थामा देखेपछि प्रहरीलाई खबर गरे ।
चार जनाको सामूहिक आत्महत्यागत शुक्रबार बनेपा नगरपालिकाको बसपार्कमा हरिभक्त दाहाल, उनको श्रीमती हरिमाया दाहाल, छोरा राजाराम दाहाल र छोरी रञ्जना दाहाल सामूहिक आत्महत्या गरेको घटनामा अनुसन्धान भईरहेको छ ।
दाहाल परिवारमा पनि दुई श्रीमतीको अंश विवादका कारण आत्महत्या गरेको प्रारम्भिक अनुसन्धानले पत्ता लगाएको छ ।
विगत १५ दिनमा काभ्रेमा ११ जनाले आत्महत्या गरेका छन् ।
श्रीमतीको खुर्पा प्रहारबाट श्रीमानको मृत्युविहीवार नै काभ्रेको पनौति नगरपालिका २ बस्ने ३१ वर्षीय सन्तबहादुर तामाङलाई श्रीमतीले धारीलो हतियार प्रयोग गरी हत्या गरेको प्रहरीले जनाएको छ ।
उनकी श्रीमती लालुमायाँ तामाङले दाउरा काट्न प्रयोग गरिने खुर्पा प्रयोग गरी हत्या गरेकि हुन् । श्रीमानले रक्सी खाएको रिसमा तामाङले खुर्पा प्रहार गर्दा सन्तबहादुरको घटनास्थलमै मृत्यू भएको थियो ।
त्यसैगरी बुधबार दिउँसो धुलिखेल नगरपालिका भट्टेडाँडाको निर्माणाधिन सारथी होटलमा काम गर्ने बर्ष ४० का सप्तरी घर भएका कुमार पौड्याल मृत भेटिए । उनको मृत्यूको कारण खुल्न सकेको छैन ।
विगत १४ दिनमा काभ्रेमा विभिन्न कारणले १४ जनाको ज्यान गएको छ जसमध्ये ११ जनाले आत्महत्या गरेको प्रारम्भिक अनुसन्धानले देखाएको जिल्ला प्रहरी कार्यलयले जानकारी दियो ।
असार १ गते काभ्रेकोे चौरी देउराली गाउँपालिका स्थित आफ्नै घरमा बर्ष १९ कि मनिषा चौलागाईले आत्महत्या गरिन् ।
असार ४ गते तिमाल वडा नं. ८ का बर्ष ६२ का नरकुमारी रायमाझी आफ्नै घरमा झुन्डिएर आत्महत्या गरिन् । असार ६ गते कटुन्जेवेशीकी लम्बरी तामाङले झुन्डिएर आत्महत्या गरिन् । असार ६ गते नै बनेपामा एकै परिवारका ४ जनाले विष सेवन गरी आत्महत्या गरे ।
त्यसैगरी असार ११ गते बनेपाका २६ बर्षिया दिवाकर परियारले आत्महत्या गरे । असार ११ गते नै पनौतीकी ६२ बर्षिया सावित्रि श्रेष्ठले विष सेवन गरी आत्महत्या गरिन् ।
जिल्ला प्रहरी कार्यलय काभ्रेका अनुशार विविध कारणले १४ दिनमा १४ जनाको मृत्यु भएको छ । जसमध्ये ६ जना झुन्डिएर, ५ जना विष सेवन गरी एकजनाको कारण नखुलेको र दुईको जना करेन्ट लागेर र एक जनाको कर्तव्य ज्यानमा मृत्यू भएको हो ।
पछिल्ला घटनालाई हेर्ने हो भने काभ्रेमा आत्महत्याका घटना निरन्तर बढिरहेको देखिन्छ । काभ्रेमा आत्महत्याका धेरै जसो घटनां दुई श्रीमतीका कारण हुने गरेको प्रहरी वताउँछ । काभ्रे प्रहरीका प्रहरी नायव उपरीक्षक (डीएसपी) नवीन राईका अनुसार काभ्रेमा पछिल्लो समय आत्महत्याको दरमा वृद्धि भएको छ ।
‘पारिवारीक समस्या, दुईवटी श्रीमती र अंश विवादका कारण आत्महत्या गर्नेको संख्या बढेको छ, राई भन्छन्,‘यसका लागि सामाजिक परिस्थिति र कमजोर मनस्थिति मुख्य कारण हुन सक्छन् ।’
शिक्षाको कमी, मदिरा र माया प्रेममा असफतापछि मानिस आवेस र उत्तेजनामा आउँदा मानिसहरुले मृत्युलाई अंगिकार गर्ने गरेको देखिएको राई बताउँछन् ।
किन हुन्छ त आत्महत्या ? जानिजानी, आफुखुशी अर्थात कसैको दबाबमा नपरी आफ्नो जीवनको अन्त्य गर्नुलाई आत्महत्या भनिन्छ ।
धुलिखेल अस्पतालका वरिष्ठ डाक्टर राजेन्द्र कोजुका अनुशार विभिन्न सामाजिक एवं मानसिक कारणले मानिसहरुले आत्महत्या गर्ने गरेका छन् । ‘मानसिक रुपमा कमजोर भएपछि मानिसको सोचाइमा नकारात्मताले प्रभाव पर्छ,’ डाक्टर कोजु भन्छन्,‘यसले मानिसमा गतल गर्ने निर्णयलाई थप प्रभावकारी बनाउँछ र आत्महत्या गर्ने निर्णयमा पुग्छ ।’
कोजुका अनुसार व्यक्तिले सहन गर्न नसक्ने घटनाका कारण पर्ने प्रभावले उनीहरु मृत्यु अगाल्ने निर्णयमा पुग्न सक्छन् । जुन योजनावद्ध भन्दा पनि हठात् हुने निर्णय हो ।
विश्व स्वास्थ्य संघको एक अनुसन्धान अनुसार प्रत्येक वर्ष संसारका नौ देखि १० लाख मानिसहरु आत्महत्या गर्छन् ।
अध्ययन अनुसार नेपालमा प्रत्येक एक लाख जनसंख्यामा नौदेखि दश जनाले आत्महत्या गर्ने गरेको पाइएको छ । तर, सन् २०१५ को अर्को एउटा रिपोर्ट अनुसार नेपालमा वर्षेनी करिव ६ हजार ८ सय ४० जनाले आत्महत्या गर्छन् अर्थात एक लाखमा करिव २५ जनाले आत्महत्या गर्छन् ।
Advertisment
Advertisment