नेकपा एकीकृत समाजवादीका सम्मानित नेता झलनाथ खनाल र एमाले उपाध्यक्ष विष्णु पौडेलबीच जम्काभेट भएको छ ।

पार्टी कामले रुपन्देही आइपुगेका खनाल र चुनावी तयारीका लागि रुपन्देहीमै रहेका एमाले उपाध्यक्ष पौडेलबीच गौतमबुद्ध अन्तर्राष्ट्रिय विमानस्थल भैरहवामा आइतवार भेटघाट र केहीबेर कुराकानी भएको हो ।

जम्काभेटपछि खनाल र पौडेलले विमानस्थलको विशिष्ट कक्षमा केहीबेर भलाकुसारी गरेका थिए ।

त्यसक्रममा खनालले 'नजिक हुने वातावरण बनेन क्यारे' भन्ने प्रतिक्रिया जनाएका थिए । 

पौडेलले 'नजिक हुने वातावरण बनाउँछु' भन्ने जवाफ दिएको समाजवादी पत्रकार संगठन रुपन्देहीका अध्यक्ष विनोद परियारले लोकान्तरलाई जानकारी दिए ।

भेटमा एकीकृत समाजवादीका केन्द्रीय सदस्य बालकृष्ण चापागाईं र एमाले रुपन्देहीका नेता गोपाल राना पनि सहभागी थिए ।

खनाल एमालेका पूर्व अध्यक्ष समेत हुन् । एमाले विभाजन भएर एकीकृत समाजवादी गठन भएपछि खनाल र पौडेलको बाटो अलग भएको थियो । 

केही समय अघिसम्म खनाल एमालेसँग सहकार्य गरेर जानुपर्ने लाइनमा थिए । तर, एमाले अध्यक्ष ओलीले खास चासो नदेखाएको भन्दै खनाल अहिले गठबन्धनकै निरन्तरताको पक्षमा लागेका छन् ।

आइतवार पनि विमानस्थलमा सञ्चारकर्मीसँग कुराकानी गर्दै खनालले सत्ता गठबन्धनबाटै आफू उम्मेदवार हुन लागेको बताए ।

अन्तिमपटकका लागि उम्मेदवार बन्न लागेको उनको भनाइ थियो ।