कात्तिक ११ गतेदेखि प्रदर्शनमा आउने तयारीमा रहेको चलचित्र ‘महापुरुष’ले मोफसल भ्रमण सकेर राजधानी फर्किएको छ । देशका प्रमुख शहरहरूमा पुगेर निर्माण टिमले विभिन्न प्रस्तुति दिँदै चलचित्रबारे प्रचारप्रसार गरेको थियो । 

मोफसल टुरमा चलचित्रको टिमबाहेक कमेडियन सुमन कार्की, गायक निशान भट्टराई, गायिका रचना रिमाल, कमेडियन विकास अर्याललगायत सहभागी थिए । निर्माण टिमले सोमवार पोखरामा कार्यक्रम गरेको थियो । जहाँ गायिका रचना रिमाल आफ्नो प्रस्तुतिपछि भावुक हुँदै स्टेजबाट बाहिरिएकी छन् । जून भिडियो युट्युब एवं टिकटकमा समेत भेट्न सकिन्छ । यसपछाडिको कारण थियो, उनीलक्षित कमेडी । 

कमेडियन विकास अर्यालले आफ्नो प्रस्तुति दिने क्रममा टिकटक चलाउने र टिकटकमा लाइभ बस्नेहरुको इज्जत नै नहुने भन्ने खालको हास्यव्यंग्य रचनालाई लक्षित गर्दै प्रस्तुत गरेका थिए । रचनाले स्टेजमा आफ्नो प्रस्तुति दिएपछि विकासको कमेडी बारे प्रतिक्रिया दिएकी थिइन् । उनले भनिन्, ‘अघि मलाई कसले के भन्नुभयो, टिकटक चलाउँदैमा इज्जत चाहिँ जाँदैन है ! उहाँको नाम पनि मलाई थाहा छैन । तर, त्यो चाहिँ उहाँले अलि नराम्रै भनेजस्तो लाग्यो ।’ भावुक हुँदै रचनाले थपिन्, ‘आई एम सरी है त्यसका लागि ।’ रचना स्टेजबाट आँशु पुछ्दै बाहिर निस्किइन् । 

त्यसपश्चात कमेडियन विकास अर्यालले स्टेजमार्फत माफी मागेका थिए । कमेडीको विधामा रोस्ट चलिरहेको बताउँदै रचनाको चित्त दुखाउनु आफ्नो उद्धेश्य नभएको विकासको भनाइ थियो । 

स्टेजमा रहेका अभिनेता राजाराम पौडेलले आफू पनि कुनै समय टिकटकमा लाइभ आउने गरेको बताउँदै भने, ‘त्यतिबेला एक÷दुई जनाले यो पनि पैसा माग्न आयो भन्न थाले । मलाई लाज लाग्यो, लाइभ बस्न छाडेँ ।’ टिकटकमा लाइभ आउनेबित्तिकै पैसा कमाउने मात्रै भन्ने भ्रम रहेको बताउँदै भने, ‘त्यसो होइन । त्यही टिकटकबाट कति जना कलाकारहरूको उदय भएको छ । कति जनाले राम्रो राम्रो प्रस्तुति गर्नुभएको छ । टिकटकमा लाइभ बस्दैमा माग्न बसेको भन्ने हुँदैन । त्यहाँ मनोरञ्जन हुन्छ । ज्ञानबद्र्धकका कुराह  हुन्छ । लाइभ बस्दैमा माग्न मात्रै बस्यो भन्ने भ्रम हटाइदिनुहोस् ।’