०२ साउन २०८३, शनिबार
हिट गीत ‘सराङकोटको डाँडैमा’ ‘लेजेन्डरी भर्सन’मा समेत आउने भएको छ । ८ महिनाअघि प्रविन भट्ट र बालगायिका पूजा देवकोटाको स्वरमा सार्वजनिक गीत टिकटकसँगै युट्युबमा निकै हिट भएको थियो । सोही हिट गीत लेडेन्डरी भर्सनका लागि रेकर्डसमेत भइसकेको छ ।
वरिष्ठ अभिनेता मदनकृष्ण श्रेष्ठले लेजेन्डरी भर्सनमा स्वर दिएका छन् । उनका साथमा चर्चित गायिका देविका बन्दनाको स्वर गीतमा सुन्न सकिनेछ । गायिका देविकाले गीत रेकर्डिङ गर्दाका तस्वीरहरू फेसबुकमा शेयर गरेकी छन् । गीतको शब्द एवं संगीत भने प्रशान्त पौडेलको हो । केही दिनमा भिडियोसहित गीत सार्वजनिक गर्ने तयारी छ ।
पछिल्लो समय हिट गीतहरू विभिन्न भर्सनमा ल्याउने क्रम बढेको छ । त्यसमा मदनकृष्ण पहिलो रोजाइमा पर्दै आएका छन् । ‘फुलबुट्टे सारी’, ‘एउटा सपना छ’ लगायत गीतको लेडेन्डरी भर्सन मदनकृष्णको स्वरमा यसअघि सार्वजनिक भइसकेका छन् ।
