गत वैशाखमा सम्पन्न भएको स्थानीयतहको निर्वाचनमा वडा अध्यक्षको टिकट नपाएका जयप्रकाश चौधरी प्रदेश सभामा निर्वाचित बनेका छन् । ग्रामथान ३ नम्बर वडाको वडाध्यक्षमा उठ्न खोेजे पनि उनलाई पार्टीले टिकट दिएन । त्यति बेला उनलाई आफ्नो पार्टी नेकपा एमालेले पत्याएन । 

मंसिर ४ गतेको निर्वाचनमा भने सो क्षेत्रमा प्रतिनिधि सभा हत्याउन एमालेले उनलाई प्रयोग गरेको चर्चा थियो । थारुको बाहुलियता रहेको क्षेत्रमा थारु उम्मेदवारको खोजी भयो । मोरङको राजनीतिमा चतुर खेलाडी मानिएका विनोद ढकाल प्रतिनिधि सभाको उम्मेदवार बन्ने पक्का भएपछि उनले चुनाव जित्नका लागि थारु समुदायको भोट तान्न चौधरीलाई टिकट दिन लबिङ गरे । टिकट पाएका चौधरीले अन्ततः नेपाली काग्रेसका बौद्धिक नेता गुरुराज घिमिरेलाई हराउँदै निर्वाचित भए । 

१५ वर्ष सम्ममा विभिन्न गैरसरकारी संस्थामा जागिर खाएका चौधरीले ग्रामिण विकास विषयमा स्नातकोत्तर पास गरेका छन् । 

एमालेबाट मोरङ क्षेत्र नंं. ४ (क) मा उम्मेदवार बनेका चौधरीले कृषिलाई प्राथमिकता दिएर उनले आफ्ना चुनावी एजेण्डा बनाएका थिए । उद्यमशीलता र कृषिलाई प्राथमिकता दिने उनको चुनावी नारा थियो । आर्थिक अवस्था सुधार, कृषिको समग्र विकास, कृषिमा आत्मनिर्भर बनाउने, कृषिको व्यावसायिकरण आफ्नो पहिलो प्राथमिकता रहेको चौधरीले बताउँछन् । सीपयुक्त व्यक्ति ल्याएर भारतीय कामदारहरू उद्योगमा नराख्ने उनको एजेण्डालाई स्थानीयले अनुमोदन गरिदिए । युवाहरूको सीप एवं दक्षता विकासका लागि नीतिगत निर्णय गरेर अघि बढ्ने चौधरीको भनाइ छ । 

घिमिरेलाई ४०७ मतअन्तरले पराजित गरी चौधरी निर्वाचित भए । चौधरीले १५ हजार ४६५ मत ल्याएर निर्वाचित हुँदा उनका प्रतिस्पर्धी घिमिरेले १५ हजार ५८ मत ल्याएका छन् ।