निर्वाचन आयोगले समानुपातिकतर्फ हालसम्म कूल ७६ लाख १२ हजार छ सय ९८ मतगणना गरेको छ । आयोगले साँझ ५ बजेर ४० मिनेटसम्म उपलब्ध गराएको विवरणअनुसार कूल ४७ राजनीतिक दलले प्राप्त गरेको मत गणना गरेको हो । 

समानुपातिक निर्वाचन प्रणालीमार्फत कूल एक सय १० प्रतिनिधिसभा सदस्य चुनिने संवैधानिक व्यवस्था छ । त्यसमा सबैभन्दा बढी नेकपा(एमाले)ले २० लाख ८९ हजार ७२ मत प्राप्त गरेको छ । दोस्रोमा रहेको नेपाली कांग्रेसले २० लाख १६ हजार ६२५ मत प्राप्त गरेको छ । तेस्रोमा रहेको नेकपा (माओवादी केन्द्र) ले ८ लाख ९१ हजार ८०८ मत प्राप्त गर्दा राष्ट्रिय स्वतन्त्र पार्टीले ८ लाख ५४ हजार ८७१ मत प्राप्त गरेको छ । 

राष्ट्रिय प्रजातन्त्र पार्टीले २ लाख ५८ हजार ४५९ मत, जनता समाजवादी पार्टीले २ लाख ४८ हजार ९६८ मत, नेकपा (एकीकृत समाजवादी) ले १ लाख ९३ हजार ९६४ मत, जनमत पार्टीले १ लाख ७८ हजार २३२ मत, नागरिक उन्मुक्ति पार्टीले १ लाख ७५ हजार ८५९ मत, लोकतान्त्रिक समाजवादी पार्टीले १ लाख ४ हजार ३४९ मत, नेपाल मजदुर किसान पार्टीले ६८ हजार ३०८ मत प्राप्त गरेका छन् । 

अन्तिम स्थानमा रहेको नेश्नलिष्ट पिपल्स पार्टीले १ हजार १५९ मत प्राप्त गरेका छन् । यही मंसिर चार गते सम्पन्न प्रतिनिधिसभाको निर्वाचनमा कूल ६१ प्रतिशत मतदान भएको थियो । सो निर्वाचनमा १ करोड ७९ लाख ८८ हजार ५७० मतदातालाई मताधिकार थियो ।     निर्वाचनमा प्रतिनिधि सभातर्फ पहिलो हुने निर्वाचित हुने निर्वाचन प्रणालीका लागि १ हजार ४१२ उम्मेदवार चुनावी प्रतिस्पर्धामा थिए । यसैगरी प्रतिनिधिसभाको समानुपातिक निर्वाचन प्रणालीतर्फ २ हजार १९९ उम्मेदवारको नाम अन्तिम बन्दसूचीमा कायम गरिएको छ ।