नाबालिग जबरजस्ती करणीको मुद्दामा थुनामा रहेका अभिनेता पल शाहको न्यायको माग गर्दै रक्तदान कार्यक्रमको आयोजना गरिएको छ । उनका फ्यानहरूले यही शनिवार खुला रक्तदान कार्यक्रमको आयोजना गरेका हुन् ।

‘पल शाह फ्यान क्लब’द्वारा शुक्रवार बिहान वसन्तपुरमा रक्तदान कार्यक्रमको आयोजना गरिएको छ । बिहान ८ बजेबाट रक्तदान कार्यक्रम शुरु हुने जनाइएको छ । 

अभिनेता पल कानूनी झमेलामा फस्नुअघि फ्यान क्लबले उनको जन्मदिनमा विभिन्न सामाजिक कार्यहरू गर्ने गरेको थियो । म्युजिक भिडियो र चलचित्रबाट असंख्य प्रशंसक कमाएका पल यतिबेला तनहुँ कारागारमा छन् । त्यहाँ उनको मुद्दा चलिरहेको छ भने नवलपुर अदालतले बाल यौन दुरुपयोगको मुद्दामा दोषी ठहर गर्दै उनलाई अढाई वर्षको जेल सजाय सुनाइसकेको छ । 

नवलपुर अदालतले पलमाथि लागेको आरोपको विषयमा फैसला गरिसकेको भए पनि तनहुँ जिल्ला अदालतमा मुद्दा विचाराधीन छ । 

नवलपुर जिल्ला अदालतको फैसलाविरुद्ध पलले उच्च अदालत पोखरामा पुनरावेदन गरेका छन् । तनहुँ जिल्ला अदालतले यही मंसिर २५ गतेलाई पेशी तोकेको छ । सोही दिन नै फैसला आउन सक्ने सम्भावना रहेको उनका कानुन व्यवसायीले बताएका छन् ।