थापाथलीस्थित नर्भिक इन्टरनेशनल हस्पिटलमा आगामी शनिवार (असार १६ गते) फ्रि कार्डियोलोजी ओपीडी हुने भएको छ ।

गत शनिवार (असार ९ गते) पनि अस्पतालका मुटुरोग विशेषज्ञ (कन्सलट्यान्ट कार्डियोलोजिष्ट) डा. शिवजी सिलवाल नेतृत्वको टीमले निःशुल्क कार्डियोलोजी ओपीडी सञ्चालन गरेको थियो ।

सर्वसाधारणहरूको अत्यधिक सहभागिता र मागका कारण डा. सिलवालको टीमले आगामी शनिवार पनि पुनः मुटुरोगसम्बन्धी निःशुल्क ओपीडी सञ्चालन गर्ने भएको हो ।

शनिवार बिहान ९ बजेदेखि ११ बजेसम्म निःशुल्क ओपीडी सञ्चालन हुने अस्पतालले विज्ञप्तिमार्फत जानकारी दिएको छ ।

निःशुल्क ओपीडीमा सहभागिताका लागि अस्पतालको ल्याण्डलाइन नम्बर ०१–५९७००३२ र मोबाइल नम्बर ९८८०८८८००० मा सम्पर्क गरेर आफ्नो नाम टिपाउन सकिनेछ ।

नेपालीहरूमा पछिल्लो समय मुटुसम्बन्धी समस्या बढ्दो छ । यही विषयलाई मध्यनजर गर्दै फ्रि कार्डियोलोजी ओपीडी सञ्चालन गरिएको अस्पलातले जनाएको छ ।

नर्भिक इन्टरनेशनल हस्पिटलले विगत लामो समयदेखि आफ्नो संस्थागत सामाजिक उत्तरदायित्त्व (सीएसआर) अन्तर्गत विभिन्न रोगका विशेषज्ञहरूको सहभागितामा निःशुल्क ओपीडी सञ्चालन गर्दै आइरहेको छ । यो क्रममा सर्वसाधारणहरूको सहभागितासमेत उल्लेख्य हुने गरेको छ ।