अभिनयबाट दर्शकको मन जितेकी अभिनेत्री हुन् सुरक्षा पन्त । उनी फेरि नयाँ फिल्मका साथ हलमा आएकी छिन् । पन्त अभिनित फिल्म ‘जुलेबी’ शुक्रवारबाट देशभरका हलमा प्रदर्शनमा आएको छ । 

काठमाडौंको रत्नपार्कलाई केन्द्रमा राखेर निर्माण गरिएको फिल्ममा सुरक्षाले यौनकर्मी महिला पात्रको भूमिका निर्वाह गरेकी छिन् । अहिलेसम्म अभिनय गरेका फिल्ममध्ये जुलेबीमा यौनकर्मीको भूमिका निर्वाह गर्न गाह्रो लागेको उनको अनुभव छ । गाह्रो लागे पनि पात्रलाई न्याय गरेर अभिनय गरेको उनले सुनाइन् । ‘यसमा समाजको संवेदनशील पात्रको भूमिका छ । कोही यौनकर्मीसँग बसेर हामी फिल्म बनाउँदैछौं भनेर कुरा गर्दा पनि उहाँहरू हच्किने डर रहन्थ्यो । उहाँहरू खुलेर कुरा गर्ने सम्भावना कम रहन्थ्यो,’ सुरक्षाले लोकान्तरसँग भनिन् ‘यद्यपि जति धेरै इन्फरमेसन आयो, त्यति पात्रलाई न्याय गर्न सकिन्छ । अलिकति चुक्यो भने राम्रो देखिँदैन । त्यसैले शुरूआतमै त्यो पात्रको तयारी गर्न गाह्रो हुने लागेको थियो ।’ 

सफल कलाकार त्यो हो जसले हरेक चुनौतीपूर्ण भूमिका निर्वाह गर्ने आँट राख्छ । सुरक्षाले चुनौतीपूर्ण भूमिका निर्वाह गर्न सक्ने अभिनेत्रीका रूपमा आफूलाई प्रमाणित गर्दै आइरहेकी थिइन् । ‘जुलेबी’मा पनि उनी चुनौती मोल्न तयार भइन् । यौनकर्मी पात्रलाई कसरी न्याय गर्ने भनेर सोँच्न थालिन् । 

वास्तविक यौनकर्मीबारे बुझ्न उनी बेलुकापख रत्नपार्क पुगिन् । तर, त्यहाँ यौनकर्मीलाई भेटेर कुरा गर्ने माहोल मिलेन । टाढाबाट ‘बडिल्याङवेज’ मात्र नियालेर फर्किइन् । 

फिल्मकै एकजना महिला सदस्यले एक यौनकर्मी महिलालाई चिनेकी रहेछिन् । उनीमार्फत् सुरक्षाले तिनलाई भेटेर कुराकानी गरिन् । 

‘उहाँ दुईवटा बच्चाको आमा हुनुहुँदो रहेछ । बच्चाहरू हुर्काइरहेकी छु । पढाइरहेकी छु भन्नुहुन्थ्यो । उहाँले एउटा कलाकारका रूपमा मलाई चिन्नुहुँदो रहेछ । भेट्दाखेरी तपाईंको फिल्म हेरिरहेको हुन्छु भन्नुभयो । खुशी हुनुभयो,’ पात्रको तयारीका कुरा सुनाउँदै उनले भनिन्, ‘उहाँलाई विश्वास लाग्यो होला सायद, धेरै कुराहरू मज्जाले सेयर गर्नुभयो । सानोसानो कुराहरू पनि सेयर गर्नुभयो । त्यसले मलाई पात्रको तयारीका लागि धेरै सहज भयो ।’

बडिल्याङवेजका लागि भने आफूलाई ‘टफ’ भएको सुरक्षा सुनाउँछिन् । यद्यपि अन्य यौनकर्मी महिलासँग कुरा गर्ने अवसर नपाए पनि उनीहरूको ‘बडिल्याङवेज’ नियालेका कारण धेरै पात्रबाट थोरै–धेरै कुराहरू लिइन् । र, अर्कै फ्यूजनको पात्रमा आफूलाई ढाल्दै गएको सुरक्षाले सुनाइन् । 

‘मेरो पात्र कोही पनि व्यक्तिलाई इंकित गरेजस्तो नदेखिएको राम्रो । यो को हो ? को हो भनेको जस्तो देखिनु राम्रो हो । त्यसले संवेदनशीलता मेन्टेन गर्छ,’ उनले सुनाइन्, ‘मैले धेरै पात्रबाट अलिअलि बडिल्याङवेज ल्याएकी हुँ । यो केटी अलिकति हावा पनि छ । सिरियस पनि छ । उडाइदिई पनि रहेको हुन्छ । घरिघरि राम्री पनि देखिइरहेको छ । घरीघरी कस्तो नराम्रो देखिइरहेको छ । त्यसरी सबै फ्यूजन गरेर तयार गरेको पात्र हो, माया ।’

सधै भिड्भाड रहने रत्नपार्कमा छायांकन गर्दाको अनुभव पनि रमाइलो रहेको उनले बताइन् । दर्शकलाई छायांकनको पत्तो नदिई टाढाबाट छायांकन गरिएको थियो । सुटिङ सकियो । 

डबिङका क्रममा सुरक्षाले फिल्म हेरिन् । त्यसपछि फिल्मलाई लिएर सन्तुष्ट छिन् उनी । भन्छिन्, ‘दर्शकलाई कस्तो लाग्ने हो, त्यो त केही दिनमा रिजल्ट आउला । तर, म चाहिँ सुखी छु । फिल्मलाई लिएर सन्तुष्ट छु ।’ 

‘जुलेबी’लाई गणेशदेव पाण्डेले लेखन एवं निर्देशन गरेका हुन् । फिल्ममा सुरक्षासँगै उषा रजक, नीशा अधिकारी, सुशील सिटौला, पुष्कर कार्की, तुफान थापा, मोनिका थापा लगायतको शीर्ष अभिनय छ । फिल्मले रत्नपार्कसँग जोडिने यी शीर्ष पात्रको चाहना र जेलिएको मायाको कुरा गर्ने सुरक्षा बताउँछिन् । फिल्ममा तह–तहमा कथा भनिएको छ । आइरहेका फिल्मभन्दा फरक स्वादको भएका कारण अर्को किसिमका दर्शकका लागि फिल्म अझ रुचीकर हुनसक्ने अपेक्षा सुरक्षाले लिएकी छिन् । 

‘हामीले अलिकति लेयरवाला फिल्म हेर्नै पाएका छैनौं, सबै सतही–सतही भयो । जेलिएका सम्बन्धहरूबारे भित्री गहिराइसम्म पुगेका कथा खोई त ? भनेर फरक खोज्नुभएका अडियन्सहरूले अझ बढी रुचाउनुहुनेछ,’ उनी भन्छिन्, ‘तर, अलि सटेन धार हेरिरहनुभएको, त्यसमा इन्जोय गरिरहनुभएका दर्शकहरू के गर्नुहुन्छ थाहा छैन । मैले देखेको मिक्स रेस्पोन्स आउन सक्छ । यद्यपि, क्रिटिक्सबाट चाहिँ राम्रो फिडब्याक आउने अपेक्षा लिएकी छु ।’ 

‘आमा’पछि सुरक्षाले गरेका प्रायः फिल्म गम्भीर कथावस्तु र अभिनयमा आधारित छन् । यसअघिका ‘बहान’ र ‘बुलाकी’ सोही प्रकृतिका थिए । मूलधारका व्यावसायिक फिल्ममा उनको उपस्थिति अलिकति कमजोर देखिन्छ । अब केही समय भने उनी गम्भीर खालका फिल्मबाट विश्राम लिने सोँचमा पुगेकी छिन् । 

पछिल्लो समय नेपाली फिल्मले अपेक्षित दर्शक तान्न सकिरहेका छैनन् । यसबारे पनि सुरक्षाले धारणा सेयर गरिन् । उनले दर्शकलाई इन्गेज गर्ने खालका फिल्म नआएका कारण नै नचलिरहेको बताइन् । 

‘फिल्म बनेर मात्र भएन, दर्शकलाई इन्गेज गर्ने खालको हुनुपर्यो । नेपाली मात्र होइन, ब्याक टु ब्याक बाहिरी फिल्महरू पनि आइरहेका हुन्छन् । दर्शकलाई थुप्रै अप्सन छ फेरि । सायद त्यही भएर पनि होला,’ नेपाली फिल्म अपेक्षित नचल्नुको कारणबारे उनको तर्क छ, ‘त्यसबोहक दर्शकहरू आफ्नो लाइफमा जेलिरहनुभएको छ । बेसिक कुरा पूरा गर्न दौडिरहनुभएको छ । हामीले त्यो खालको फिल्म नै दिएका छैनौं । उहाँहरूले केही समय छुट्याएर इन्टरटेन हुन जान्छु भन्ने फिल्म अझै दिएका छैनौं कि भन्ने लाग्छ ।’

उनलाई थुप्रै फिल्मबाट अफर पुगिरहेको हुन्छ । यतिबेला पनि केही फिल्मको स्क्रिप्ट पढिरहेकी छिन् । यद्यपि, पछिल्लो समय धेरै अफरहरू अस्वीकार गरिरहेको उनले बताइन् । आगामी फिल्म ‘कार्साङ’मा सुरक्षाले अभिनेता दयाहाङ राईसँग जोडी बाँध्दैछिन् । अब उनलाई केही भूमिकाहरू गर्न मन छ । ‘स्पोर्टसमा लाग्नुभएका महिलाहरूको भूमिका गर्न मन छ । पुलिस प्रशासनमा लाग्नुभएका महिलाहरूको भूमिका गर्न पनि मन छ । फिजिकल्ली अलिकति च्यालेन्ज हुने फिल्महरू गर्न चाहन्छु’ कुराकानीको बिट मार्ने क्रममा उनले सुनाइन् ।