०४ साउन २०८३, सोमबार
लगातारको भारी वर्षाका कारण नारायणगढ–मुग्लिन सडक खण्डका विभिन्न स्थानमा पहिरो गएपछि जिल्ला प्रशासन कार्यालय चितवनले सवारी आवागमनमा पूर्ण रोक लगाउने निर्णय गरेको छ ।
सोमबार साँझ एक सार्वजनिक सूचना जारी गर्दै प्रशासनले अर्को सूचना नभएसम्म सबै प्रकारका सवारी साधनलाई सडक खण्डमा चल्न निषेध गरेको हो ।
पहिरोको उच्च जोखिम रहेकाले काठमाडौं उपत्यकाबाट बाहिर यात्रा नगर्न र पश्चिम (रूपन्देही, नवलपरासी) बाट काठमाडौंतर्फ आउँदै गरेका यात्रुहरूलाई चितवनभन्दा अगाडि नबढ्न आग्रह गरिएको छ ।
प्रमुख जिल्ला अधिकारी गणेश अर्यालले यात्रुहरूलाई आफ्नो साथमा खानेपानी, सुक्खा खानेकुरा, प्राथमिक उपचारका औषधि, थप लुगा र मोबाइल चार्जर जस्ता अत्यावश्यक सामग्री राखेर मात्र यात्रा गर्न सुझाव दिएका छन् ।
संकटको बेला सहयोग र समन्वयका लागि नेपाल प्रहरी (१००), सशस्त्र प्रहरी (१११४), जिल्ला आपत्कालीन केन्द्र (१२३४) वा जिल्ला प्रहरी कार्यालय चितवनको सूचना अधिकारी (९८५५०१३९९९) मा सम्पर्क गर्न प्रशासनले अनुरोध गरेको छ ।
