नेपाली फिल्मकी सफल निर्देशक एवं अभिनेत्री दीपाश्री निरौलाले बिहीवार आफ्नो जन्मदिन मनाइरहेकी छिन् । बिहानैदेखि उनलाई सेलिब्रेटी एवं शुभचिन्तकहरूले शुभकामना दिइरहेका छन् । 

३ दशकदेखि सहकार्य गर्दै आएका अभिनेता एवं निर्माता दीपकराज गिरीले दीपाश्रीलाई जन्मदिनको शुभकामना दिँदै उनलाई आफ्नो जीवनको उत्कृष्ट साथी भएको बताएका छन् । 

सामाजिक सञ्जाल फेसबुकमा कविता पोस्ट गर्दै दीपकले दीपाश्रीको प्रशंसा गरेका छन् । 

दीपकले तीन दशकअघि दीपाश्रीलाई पहिलो पटक भेट्दाको अनुभव पनि सेयर गरेका छन् । 

दीपकले लेखेका छन् :– 
यो केटी त कस्ती घमण्डी ! मै हूँ भन्छे !
बोल्ने त परै जाओस् हेर्दा पनि हेर्दिन !
आज भन्दा करिब ३ दशकअघि तिमीसंगको पहिलो भेट, मलाइ आज पनि याद छ ।
जसरी हामी किताबको कभर हेरेकै भरमा
पूरै विषय अनुमान गर्छौ ठीक त्यस्तै
तिमी प्रतिको धारणा पनि तुरुन्तै बनाएको थिए मैले !
तर मलाइ थाहा थिएन यो त्यही केटी हो
जो अरूको पीडालाई आफ्नो सम्झेर समय बिताउँछे ! 
जिन्दगीको खेलमा आफू हार्छे
तर अरूलाई जिताउँछे !
म प्रतिको तिम्रो योगदानलाई त
सिर्फ एक शब्दमा बुनेको छु ।
चोट मलाई लाग्दा, तिमीले ऐआ भनेको सुनेको छु !
कमजोरी पनि भनिदिन्छु,
यहाँ हरेकको हातमा क्यालकुलेटर छ
कहाँ फाइदा, कहाँ बेफाइदा
कहाँ जोर छ, कहाँ बिजोर छ
दिमागै दिमागको शहरमा तिमी, मनको कुरा गर्छौ
त्यसैले तिम्रो हिसाब कमजोर छ ।
मेरो जिन्दगीको उत्कृष्ट साथीलाई जन्मदिनको लाखौं करोडौं र अरबौ शुभकामना ।