२९ असार २०८३, सोमबार
सुडानको एक अदालतले अर्धसैनिक समूह र्यापिड सपोर्ट फोर्स (आरएसएफ) का नेता मोहम्मद हमदान दाग्लो र अन्य १५ जनालाई अनुपस्थितिमै मृत्युदण्डको फैसला सुनाएको छ। उनीहरूमाथि पश्चिम डारफरका गभर्नर खामिस अब्बाकरको हत्या तथा युद्ध अपराध, मानवताविरुद्धको अपराध र नरसंहार गरेको आरोप लागेको छ।
सन् २०२३ अप्रिलमा सुडानी सेना र आरएसएफबीच युद्ध सुरु भएपछि आरएसएफ नेतृत्वविरुद्ध आएको यो पहिलो अदालतको फैसला हो। दोषी ठहर हुनेमा दाग्लोका भाइ तथा आरएसएफका उपनेता अब्देलरहीम हमदान दाग्लोसहित केही सैन्य अधिकारी र जनजातीय नेता पनि छन्।
अदालतले मुद्दा सर्वोच्च अदालतमा समीक्षाका लागि पठाउने तथा दोषीहरूलाई इन्टरपोललगायत अन्तर्राष्ट्रिय संयन्त्रमार्फत पक्राउ गरी प्रत्यर्पण गर्ने प्रयास गरिने जनाएको छ।
सन् २०२३ जुनमा पश्चिम डारफरका गभर्नर खामिस अब्बाकरको हत्या भएको थियो। संयुक्त राष्ट्रसङ्घका अनुसार एल–जेनिनामा भएको हिंसामा १० हजारदेखि १५ हजारसम्म मानिस मारिएका थिए। आरएसएफले भने आफूविरुद्ध लागेका नरसंहार र युद्ध अपराधका आरोप अस्वीकार गर्दै आएको छ।
