चलचित्र ‘कार्साङ’मा अभिनेत्री शिल्पा मास्के अनुबन्धित भएकी छन् । 

यम शेर्पाको निर्देशनमा बन्न लागेको चलचित्रमा यसअघि मुख्य कलाकारका रूपमा अभिनेताद्वय दयाहाङ राई र बुद्धि तामाङ फाइनल भइसकेका छन् । यस्तै, चलचित्रमा नायिकाको रुपमा सुरक्षा पन्त र नव–कलाकार छिरिङ शेर्पा फाइनल भइसकेका छन् । 

शिल्पा पनि भित्रिएपछि ३ जना नायिकाहरूले चलचित्रमा काम गर्ने पक्का भएको छ । 

यस चलचित्रमा शिल्पा अनुबन्धित भएसँगै प्रमुख कलाकारहरूको लाइनअप पुरा भएको निर्देशक शेर्पाले जानकारी दिए । शेर्पाको यो डेब्यू निर्देशकीय चलचित्र हो । चलचित्रमा उनी स्वयंको कथा, पटकथा तथा संवाद छ । यसअघि शेर्पाले थुप्रै छोटा चलचित्रको निर्देशन गरिसकेका छन् । 

‘कार्साङ’ शेर्पा जातिको सामाजिक कथावस्तुमा निर्माण हुने बताइएको छ । यो चलचित्र यार्सा फिल्मसको ब्यानरमा निर्माण हुन लागेको हो । 

पुरुषोत्तम प्रधानको छायांकन रहने चलचित्रको केही दिनमै बाह्रबिसे नगरपालिका र भोटेकोसी गाउँपालिका विभिन्न स्थानमा छायाकंन गरिने निर्माण पक्षले बताएको छ । 

चलचित्रको ओभरसिज राइट्स छायाकंन अगावै बिक्री पनि भइसकेको छ । यो चलचित्रलाई अन्तर्राष्ट्रिय बजारमा सेभेन सिज इन्टरटेनमेन्ट कम्पनीले रिलिज गर्ने भएको छ । 

चलचित्रको देशभर वितरणको जिम्मेवारी आरआर फिल्मसले लिएको छ ।