व्यवस्था परिवर्तन गर्न भन्दै आएको अराजक भीडलाई बल्खुमा अलपत्र छाडेर आन्दोलनका संयोजक दुर्गा प्रसाईं हिँडेपछि झडप भएको छ ।

बिहीबार दिउँसो २ बजेको समयमा प्रसाईं बल्खु क्षेत्रबाट हिँडेका थिए । दिउँसो साढे १ बजेको समयमा बल्खु पुगेका प्रसाईंले संक्षिप्त सम्बोधन गरे ।

प्रसाईं हिँडेपछि चर्को नाराबाजी गरिरहेको समूह ‘सिंहदरबार घेर्न’ जाने भन्दै बल्खुबाट कुलेश्वरतर्फ लागेको थियो ।

कुलेश्वरतर्फ जान लागेको भीडलाई नियन्त्रण गर्न प्रहरीले अश्रु ग्यास प्रहार गर्‍यो । 

त्यसपछि प्रदर्शनकारी केहीबेर पछि हटेका थिए । आन्दोलनकारी पुनः आक्रोशित बनेपछि प्रहरीले फेरि अश्रुग्साय र पानीको फोहरा चलायो । त्यसपछि आन्दोलनकारी तितरबितर भएका छन् । 

सयौंको संख्यामा उपस्थित भए पनि विरोध कार्यक्रम व्यवस्थित नहुँदा प्रदर्शनकारीहरू अन्योलमा परेका थिए । एउटा जुलुस बल्खु आउन नपाउँदै प्रसाईंले सम्बोधन गरिसकेका थिए ।

भीड जम्मा भए पनि त्यहाँ मञ्चको कुनै व्यवस्था गरिएको थिएन । कार्यक्रमको शुरूमै प्रसाईंले सम्बोधन गरे । राप्रपाका सांसद ज्ञानेन्द्र शाहीले पनि भीडलाई संक्षिप्त सम्बोधन गरे । 

बल्खुमा उपस्थित सहभागीमध्ये कतिपयले प्रसाईंले सम्बोधन गरेको थाहै पाएनन् । सम्बोधनका क्रममा प्रसाईंले राजनीतिक दलका नेताको चर्को आलोचना गरेका थिए । 

उनी हिँडिसक्दा पनि अधिकांशले कार्यक्रम सकिएको पत्तै पाएनन् । प्रसाईंले भोलि पनि प्रदर्शन गर्ने बताएका छन् ।

हेर्नुहोस्, प्रसाईं हिँडेपछिको दृश्य :