ईपीएस अन्तर्गत कोरिया जान सीप बिल्डिङमा आवेदन दिएका परीक्षार्थीले म्यानुफ्याक्चरमा आफूहरूले पनि आवेदन दिन पाउनुपर्ने माग गर्दै ईपीएस कार्यालय ग्वार्को हाताभित्र प्रदर्शन गरेका छन् ।

यसअघि सीप बिल्डिङमा आवेदन दिएका तथा परीक्षा दिएकाहरूले म्यानुफ्याक्चरमा आवेदन दिन नपाउने नयाँ नियम आएसँगै उनीहरू आन्दोलित भएका हुन् । ३२ हजार परीक्षार्थीहरू भविष्यमाथि खेलवाड भएको भन्दै ईपीएस सीप बिल्डिङ पीडितहरू आन्दोलित भएका हुन् ।

जसमा ‘बुँदा नम्बर छ खारेज गर, २४ को कोटा २४ मै खोल, ३२ हजार विद्यार्थीमाथि खेलवाड गर्न पाइन्न’ लगायत मागहरू छन् । प्ले कार्ड बोकी परीक्षार्थीहरूले शान्तिपूर्ण प्रदर्शन गरेका हुन् । कोरियाको रोजगार अनुमति प्रणाली ईपीएसको सीप बिल्डिङमा ३२ हजारले आवेदन दिएका थिए ।

सिफलबाट आएका रामलाल श्रेष्ठले पहिले अरू क्षेत्रमा पनि काम गर्न पाइने भनियो तर अहिले अन्य क्षेत्रमा फारम भर्न पाइँदैन भनेपछि आन्दोलित हुनुपरेको बताए । 

‘हामीले पहिला सीप बिल्डिङ क्षेत्रमा फारम भर्यौ । त्यतिबेला हामीलाई अरु क्षेत्रमा पनि फारम भर्न पाउनुहुन्छ भनियो । तर अहिले अन्यमा नपाइने भनेर सूचना जारी गरियो’ उनले लोकान्तरसँग भने, ‘यो त हामीमाथि अन्याय भयो हामीले म्यानुफ्याक्चर क्षेत्रमा पनि फारम भर्न पाउनुपर्छ ।’ 

२०२४ को कोटा १२ दिन बाँकी हुँदा खुलाएकोमा पनि उनले आक्रोश व्यक्त गरे । ‘२०२४ को कोटा आज १२ दिन अघि २०२३ मा किन खुलाएको २४ को कोटा २४ मै खुलाउनुपर्यो नि’ आक्रोशित हुँदै उनले भने, ‘यो त सरासर हामीमाथि धोखा धडी भएन र ?’

३ दिनदेखि जारी शान्तिपूर्ण प्रदर्शनलाई मंसिर २५ गतेसम्म जारी राख्ने उनीहरूले बताएका छन् । माग पूरा नभए २५ गतेदेखि थप सशक्त आन्दोलन थाल्ने चेतावनी समेत उनीहरूले दिएका छन् ।​

पीडितहरूले ‘२०२४ को म्यानुफ्याक्चरमा समेत आवेदन भर्न पाऊँ’ भनि ईपीएस कार्यालय ग्वार्को, श्रम मन्त्रालय र वैदेशिक रोजगार विभागमा दुई सय जना पीडितहरूले हस्ताक्षरसहित ज्ञापन पत्र बुझाएका छन् ।